बाजुरा : बडिमालिका नगरपालिकाका प्रमुख प्रकाशकीय अधिकृत त्रिलोक चन्दमाथि अज्ञात समूहले कुटपिट गरेको छ । शनिबार राती १० बजेपछि कोठामा सुतिरहेको बेला तीनजनाको समुहले चन्दमाथि आक्रमण भएको जिल्ला प्रहरी कार्यालय बाजुराले जनाएको छ । कुटपिटबाट उनको टाउको र शरीरमा चोट लागेको छ ।
कुटपिटका क्रममा एकजनाको घडीको चेन चुँँडिएर चन्दको कोठामै खसेको अवस्थामा फेला परेको डीएसपी सागर बोहोराले जानकारी दिए । ‘प्रशासकीय अधिकृकमाथि कुटपिट भएको कारणबारे आफुलाई थाहा नभएको बडिमालिका नगरपालिकाका नगर प्रमुख पदम बडुवालले बताए ।
‘आक्रमणकारी पहिले मेरो कोठामा पसेका रहेछन्, त्यहाँ मलाई नभेटेपछि प्रशासकीय अधिकृतमाथि कुटपिट गरेछन्’, उनले भने ।
व्यक्तिगत विवाद र कसैसँग रिसइबी नरहेको बताउँदै उनले नगरपालिकाको आन्तरिक विवादमा बडिमालिका नगरपालिका–८ का वडाअध्यक्ष प्रकाश रावलले आफुमाथि कुटपिट गर्न लगाएको हुनसक्ने अधिकृत चन्दले जानकारी दिए ।
वडाअध्यक्ष रावलले आफूमाथि लगाएको आरोप गलत भएको बताएका छन् । ‘मेरो कोठामा पनि तोडफोड भएको छ’, उनले भने, ‘मलाई फसाउने षड्यन्त्र भएको छ ।’ घटनाबारे अनुसन्धान भइरहेको जिल्ला प्रहरी कार्यालयका डीएसपी सागर बोहोराले जानकारी दिए ।
प्रतिक्रिया दिनुहोस !
