धनगढी : कैलालीको गौरीफन्टा नाकामा आउजाउ सहज छ । दसैंमा घर फर्किरहेका नेपालीले सास्ती नपाउन् भनी नाकामा प्रहरीको उच्च निगरानी छ । प्रहरीले सीमामा दुईवटा कुकुर पनि नियमित परिचालन गरेको छ ।
केही दिनअघि गौरीफन्टामा भारतीय कस्टम कर्मचारीले नेपालीबाट रकम लिइरहेको सार्वजनिक भएपछि भारत सरकारले त्यहाँ कार्यरत सबै कर्मचारी सरुवा गरेको थियो । त्यसपछि अवैध असुली कम भएको छ ।
‘गत वर्ष नाकामा भारततिरै एक हजार तिरेको थिएँ’, भारतको बंगलोरबाट कञ्चनपुर आउँदै गरेकी यशोदादेवी सुनारले भनिन्, ‘खै यसपालि त एक रूपैयाँ पनि तिर्नुपरेन ।’ उनी दिल्ली–धनगढी चल्ने नेपाली नम्बरको गाडीमा आएकी हुन् ।
गौरीफन्टाबाट पाँचवटा भारतीय गाडी दैनिक एक गाडीका दरले दिल्ली जान्छन् । गत वर्ष तिनै गाडी चालक र परिचालकले यात्रुबाट एकमुष्ट रकम उठाएर नाकाका सुरक्षाकर्मीलाई दिने गरेको सार्वजनिक भएको थियो । ‘यसपालि कसैले रकम मागेन, झोला जाँच्यो अनि छोडिदियो’, बंगलोरबाटै फर्केका अछामका बिक्रम शाहीले भने ।
मुख्यमन्त्रीको सीमामा छड्केबुधबार सुदूरपश्चिमका मुख्यमन्त्री त्रिलोचन भट्ट गौरीफन्टा सीमानाका पुगेका छन् । बिहानै कसैलाई खबर नगरी उनी टोलीसहित पुगेका थिए ।
दसैंमा फर्किने नेपालीबाट अवैध रकम असुली र दुव्र्यवहार हुन थालेको सुनेपछि नाकामा आएको उनले बताए । उनले एसएसबी, कस्टम कर्मचारी, नेपाल प्रहरी र ससस्त्र प्रहरीलाई सीमा क्षेत्रमा आवागमन सहज बनाउन निर्देशन दिए ।
‘दसैंमा घर फर्किरहेका नेपालीले दुःख पाइरहेका छन् भनेर सुनेपछि आफंै सीमामा आएको हुँ’, मुख्यमन्त्री भट्टले भने । मुख्यमन्त्री पुगेपछि कैलालीका प्रमुख जिल्ला अधिकारी बाबुराम श्रेष्ठ र एसपी विनोद घिमिरे पनि नाकामा पुगेका थिए ।
नाकामा राजा र फुच्चे
नेपाल प्रहरीको दसैं, तिहार र छठको विशेष सुरक्षा योजनाअन्तर्गत धनगढीको कुकुर शाखाका राजा र फुच्चेलाई सुदूरपश्चिमको राजधानी जोडिएको गौरीफन्टा नाकामै खटाइएको छ ।
बिहानै वडा प्रहरीको गाडी राजा र फुच्चेलाई लिएर गौरीफन्टा पुग्छ । राजा विष्फोटक पदार्थ पत्ता लगाउने कुकुर हो । ल्याब्राडोर जातको राजालाई प्रहरी जवान दीपक विकले परिचालन गर्छन् । दसैमा दुःखद् घटना नहोउन् भनेर राजा र फुच्चेलाई नाकामा खटाइएको विकले बताए ।
फुच्चे पनि ल्याब्राडोर जातकै कुकुर हो । ८ महिनाअघि प्रहरी प्रधान कार्यालयले धनगढीको संघीय प्रहरी इकाई कार्यालय परिसारभित्र कुकुर शाखा खोलेको हो ।
प्रतिक्रिया दिनुहोस !
