काठमाडौं : बुद्धनगरमा रहेको एपी वान एचडी टेलिभिजनको स्टुडियोभित्रको हल । नेपाल आइडल सिजन–२ अन्तर्गत २०औं एपिसोड चलिरहेको थियो । उत्कृष्ट १० बीच कडा प्रतिस्पर्धा छ । प्रतियोगीले बिहीबार दिएको प्रस्तुतिका आधारमा शुक्रबार एलिमिनेसन राउन्ड चलिरहेको थियो । यत्तिकैमा एकजनाले नेपाल आइडलको मञ्च छोडेर जानुपर्ने क्षण आयो ।
एकाएक माहोल सुनसान भयो । प्रतिस्पर्धी सबैले शुक्रबारको आफ्नो प्रस्तुति सकेपछि उद्घोषकले जब मञ्चबाट बाहिरिने व्यक्तिको नाम लिए, त्यसपछि सुरु भयो बिदाइ कार्यक्रम । बाहिरिँदै थिए, चितवनका मीनराज पौडेल । उनका सबै साथी भक्कानिँदै थिए अनि मीनराजलाई अँगालो हालेर आत्मीयता दर्शाइरहेका थिए ।
मीनराज भने आँखाबाट खस्न लागेको आँसु लुकाउँदै मुस्कुराउने कोसिस गरिरहेका थिए । सबै भावविह्वल थिए । जजहरू पनि निःशब्द थिए । मीनराजलाई सम्झाउन कसैले शब्द निकाल्न सकिरहेका थिएनन् । मेगा अडिसनमा पहिलोपटक गोल्डेन माइक जितेर उनी सीधै टप १२ मा सहभागी भएका थिए ।
‘मन जित्छ उसले, राम्रो गाउँछ जसले’ नाराका साथ नेपाल आइडल सिजन–२ गत साउन २४ देखि सुरु गरिएको हो । नेपाल आइडलका च्यानल हेड लक्ष्मीप्रसाद पौडेल हुन् भने प्रोजेक्ट हेड सुरेश पौडेल छन् । कार्यक्रम निर्देशकहरू सुरेश पौडेल, लोकेश वज्राचार्य र एलन श्रेष्ठ छन् ।
यस्ता छन् उत्कृष्ट प्रतियोगी
विक्रम बराल
विक्रम बराल लामो समयदेखि संगीतमै लागेका छन् । चितवन स्थायी घर भएका उनी हाल पोखरामा बसेर पढाइसँगै सांगीतिक क्षेत्रमा समेत काम गरिरहेका छन् । संगीत सिक्ने र यही क्षेत्रमा केही विशेष गर्ने तिर्खाले उनलाई कहिले क्लासिक भोकल सिक्ने ठाउँमा पुर्यायो त कहिले गजल ब्यान्डमा । हाल उनी पोखराकै रक ब्यान्ड अडियो फर्ममा काम गरिरहेका छन् ।
उनले नेपाल आइडलमा सबैले मन पराएका प्रतियोगीका रूपमा आफ्नो परिचय बनाइसकेका छन् । नेपाल आइडलको पहिलो सिजनमा पनि सहभागी भएका उनी मेगा अडिसनबाटै बाहिरिएका थिए । जसरी पनि यही क्षेत्रमा राम्रो गर्छु भन्ने आत्मविश्वास राखेका उनकी आमा पनि गीत गुनगुनाउने गर्छिन् । उनले त्रिवेणी संगीतालयमा दुई वर्ष संगीतको औपचारिक शिक्षा लिएका छन् ।
पवन गिरी
आफ्नो मीठो स्वरको जादुले सबैको मन जित्न सफल भएका छन्, दोलखाका पवन गिरी । काठमाडाैंको शंकरदेव कलेजमा बीबीएस पढ्दै गरेका पवनले औपचारिक रूपमा संगीत सिक्न भने पाएका छैनन् । कहिले पसलमा सेल्स ब्वाइ त कहिले मार्केटिङको काम गरेर गुजारा गरिरहेका गिरीको मनमा संगीतको नशा भरिएको छ ।
नेपाल आइडल सिजन–१ मा छनोट नभएपछि केही समय त उनी निकै फ्रस्टेड पनि भए । घरनजिकै चर्च थियो । एउटा साथीको सहयोगले उनी त्यहाँ पुगे । त्यहाँ संगीतका सबै साधन थिए जसले उनलाई आफ्नो क्षमता बढाउने मौका दियो । दिनदिनै चर्च जाने, गीत गाउने र त्यहाँ गितार, हार्मोनियम बजाउन सिक्न थाले । यही मेहनतले उनलाई नेपाल आइडलको उत्कृष्ट १० प्रतियोगीको रूपमा ल्याउन सफल भयो ।
क्रिसल कँडेल
धादिङबेँसीका क्रिसल सानैदेखि गीत गाउने रुचि राख्थे । पोखरा अडिसनबाट नेपाल आइडलमा छनोट भएका क्रिसलले रेडियोमा गीत सुनेरै गाउने सीप सिके । घरमा हुँदा उनका दाइ पनि गीत गाउने गर्थे ।
सबै प्रकारका गीत गाउन सक्ने क्रिसल मेहनत गरेमा चाहेको कुरा पाइन्छ भन्नेमा ढुक्क छन् । गीत सुन्दै गर्दा जस्तो सुन्यो त्यस्तै आफूले पनि गाउन कोसिस गर्छन् । दैनिक पाँच छ घन्टा रियाज गर्ने क्रिसल संगीतलाई कुनै परिभाषाले समेट्न नसकिने बताउँछन् ।
रवि ओड
स्थानीय सांगीतिक कार्यक्रममा आफ्नो प्रस्तुति दिएर जिल्लामा परिचय बनाइसकेका छन्, कञ्चनपुरका रवि ओडले । सानो हुँदा नै आमा गुमाएका रवि गाईबस्तु चराउन जाँदा साथीसँग गीत गाउने गर्थे । यसले उनलाई संगीततर्फ तान्दै लग्यो ।
स्कुल कलेजका कार्यक्रममा रवि छुट्दैनथे । आफूलाई लोकदोहोरी, देउडा, क्लासिक, मेलोडियस फिल्मी सबै प्रकारका गीतमा फिट हुने स्वरको साथ पाएका ओड यही क्षेत्रमै आफूलाई समर्पित गर्ने बताउँछन् । संगीतमा लाग्न घरपरिवारबाट पनि सहयोग मिलिरहेकोमा आफूलाई भाग्यमानी ठान्छन् उनी ।
अमित बराल
बुटवल सैनामैनाका अमित बराल पनि नेपाल आइडलका रुचाइएका प्रतियोगी हुन् । बुटवलमा रहेको लुम्बिनी कला केन्द्रमा करिब दुई वर्ष उनले संगीत सिक्ने मौका पाए । घरमा दाजु पनि संगीतमै चाख राख्ने गर्थे । दाजुले गीत गाएको देखेरै उनमा पनि यो क्षेत्रप्रति सम्मान जाग्यो । आफूलाई संगीतको नशा भरिदिने दाजुको साथ भने उनले लामो समय पाएनन् ।
एक दुर्घटनामा दाजुको मृत्यु भएपछि अमितमा झन् जिम्मेवारी बढ्यो । दाजुको सपना आफूले पूरा गर्नुपर्छ भन्ने लाग्यो । उनी यस क्षेत्रप्रति दिलोज्यान दिएर लागे । हरेकपटक गीत गाउनुअघि दाजुलाई सम्झिने अमितले बुटवलमा ब्यान्ड पनि खोलेका छन् । उनी भन्छन्, ‘मेरो जिन्दगीको अन्तिम लक्ष्य र बाँच्ने आधार पनि संगीत हो ।’
सुमित पाठक
नेपाल आइडलको बिहीबारको एपिसोडमा दमदार प्रस्तुति दिएका थिए, झापाका सुमित पाठकले । सांगीतिक माहोलमा हुर्किएका सुमितका बुवा पनि संगीत शिक्षक हुन् । बच्चादेखि नै उनी गायनमा अब्बल थिए । सानोमै आमाको मायाबाट वञ्चित पाठकलाई संगीतले भने निरन्तर साथ दिइरह्यो ।
उनले अडिसनमा गोल्डेन माइक प्राप्त गरेका थिए । संगीतमा औपचारिक सीप सिक्न र साधना गर्न नपाएको बताउने सुमितले युट्युब हेरेर गाउन सिकेको बताए । अडिसनमा छनोट भएपछि मात्र उनले आफ्नो भोकल तिखार्ने मौका पाए । उनले संगीतगुरु इन्द्र आर्वीसँग संगीतका सुर, ताल, राग, साधना र सरगम सिकिरहेका छन् ।
अस्मिता अधिकारी
पेसाले नर्स हुन्, अस्मिता अधिकारी । स्वास्थ्यसँगै संगीतमा केही खास गर्ने रहर भरिएको छ उनमा । उनी संगीत र नर्सिङ पेसालाई एकसाथ लाने सोचबाट अघि बढेकी छन् । झापामा जन्मिएकी उनी हाल काठमाडौं बसेर आफ्नो पढाइ अगाडि बढाइरहेकी छन् ।
औपचारिक रूपमा ६ महिना शास्त्रीय संगीत सिकेकी उनी नर्सिङ पढ्दै गर्दा पनि औपचारिक कार्यक्रममा गीत गाउने गर्थिन् । नेपाल आइडलमा उनले धेरै प्रतिस्पर्धीसँग संगत गर्ने, समूहमा गीत गाउने र अन्य धेरै सीप सिक्न पाएको बताइन् । भन्छिन्, ‘संगीतका टेक्निकल पाटोबारे थप जान्ने मौका पाएँ ।’ सेवासँगै संगीतलाई सँगै लान सक्ने क्षमता आफूसँग भएको बताउने अस्मिता नेपाल आइडलले आफ्नो सपना पूरा गर्ने विश्वास गर्छिन् ।
नीलिमा थापा
आइडलको सुरुदेखि नै आफ्नो स्वरको जादु चलाउन सफल पोखराकी नीलिमा थापाले भर्खरै मात्र कक्षा १२ सकाएकी हुन् । धेरैजनालाई साथी बनाउन नसक्ने स्वभावकी नीलिमा गायनलाई नै साथी बनाएको बताउँछिन् । भन्छिन्, ‘गीत नै मेरो साथी, गीत नै मेरो जिन्दगी ।’
उनी पनि गोल्डेन माइक पाएकी प्रतियोगी हुन् । भन्छिन्, ‘नसोचेको सफलता पाइरहेकी छु, यसबाट मलाई थप मेहनत गर्ने हौसला मिलेको छ ।’ आफ्नो बोली र स्वरमा अत्यन्तै फरकफरक टोन भएकी नीलिमाको स्वरमा सबै गीत फिट हुन्छ । उनले विभिन्न औपचारिक कार्यक्रममा स्टेज प्रस्तुति पनि दिने गरेकी छन् । उनी पोखराकै स्कुलमा पढाउँछिन् ।
सुविन सिंह
सुर्खेतका सुविन सिंह पनि नेपाल आइडलका चर्चित प्रतियोगी हुन् । संयुक्त परिवारमा हुर्केका उनी करिब चार वर्ष कतार बसेर आएका हुन् । संगीत क्षेत्रमा उनको रहर पनि सानैदेखिको हो । आफ्नी दिदीसँगै अडिसनमा गए पनि उनी भने छनोट हुन् सकिनन् । उनी अडिसनकै लागि अस्ट्रेलियाबाट आएकी थिइन् ।
अलिकति डर, अलिकति खुसी, अलिकति जिम्मेवारीसँगैको अहिलेको अवस्था उनका लागि जीवनकै अमूल्य समय हो । सुरुमा संगीतमा आशावादी नरहेका सुविन नेपाल आइडलले आफ्नो लक्ष्य नै फेरिदिएको बताउँछन् । भन्छन्, ‘फेरि कतार जान भिसा अप्लाई गरेको थिएँ, अब भने यही क्षेत्रमा मेहनत गर्छु ।’ नामसँगै जिम्मेवारी पनि थपिएकोमा उनी बढी सिरियस देखिन्छन् ।
को हुन् मीनराज
चितवनका मीनराज पौडेल शुक्रबार नेपाल आइडलबाट बाहिरिएका छन् । उनी पेसाले शिक्षक हुन् । घरमा सांगीतिक माहोल थियो । उनका बुवा मादल बजाउने, गीत गाउने तथा गाउँघरमा भजन गाउने गर्थे ।
यसले उनलाई सानैदेखि संगीतको संगत गर्ने मौका मिल्यो । हेटौंडा अडिसनबाट उनले गोल्डेन माइक जित्ने सौभाग्य पाएका थिए ।
रहरैरहरको संगीतप्रतिको लगावले उनलाई नेपाल आइडलको मञ्चमा ल्याइपुर्यायो । नेपाल आइडलको आँगनमा संगीतको ताल, सरगम, तराना, राग र आलापका बारेमा सिक्न पाएको मीनराज बताउँछन् ।
उनीमाथि सबैको आशा अनि विश्वास थियो । पछिल्लो समय उनको स्वास्थ्यले साथ दिएको थिएन ।
बिहीबारको उनको प्रस्तुति त्यति राम्रो हुन सकेन । उनलाई स्वरले साथ दिएको थिएन । संगीत जीवनको अन्तिम लक्ष्य हो भन्ने मीनराजले औपचारिक रूपमा संगीत सिक्न भने पाएका छैनन् ।
प्रतिक्रिया दिनुहोस !
