भैरहवा : प्रहरीले भारतबाट अवैध रुपमा ल्याउँदै गरेको कपडा बरामद गरेको छ । पराल बोकेको ट्रकमा अवैध रुपमा कपडा लुकाएर ल्याउँदै गर्दा नवलपरासी जिल्लाको बर्दघाट नगरपालिका त्रिवेणी चोकबाट बरामद गरिएको सशस्त्र प्रहरी नायब उपरीक्षक गोविन्दबहादुर खातीले जानकारी दिए ।
उनले पराल बोकेको ना २ ख ६१७५ नम्बर ट्रकमा राजश्व छली गरेर भित्र्याइएको १ सय ४४ थान कुर्ता सुरुवाल, ९० थान साडी र २ सय ९३ मिटर पर्दाको कपडा बरामद भएको बताए ।
६ लाख मूल्य बराबरको कपडासहित ट्रकसमेत प्रहरीले नियन्त्रणमा लिएको छ । भारतीय सिमानाका झुल्नीपुरबाट भित्र्याइएको कपडा चितवन लैजान लागिएको अवस्थामा बरामद गरिएको छ । बरामद कपडा र ट्रक भैरहवा भन्सार कार्यालयमा बुझाइएको सशस्त्र प्रहरीले जनाएको छ ।
नवलपरासी क्षेत्रबाट प्रहरीकै मलोमतोमा तस्करी भइरहेको स्रोतले बताएको छ । नवलपरासीमा सुरक्षा निकायकै संरक्षणमा तस्करी मौलाएपछि प्रहरी रुपन्देही र नवलपरासी क्षेत्रमा तस्करी नियन्त्रणमा लागेको छ ।
सशस्त्र प्रहरी बल नेपाल राजश्व भन्सार सुरक्षा नम्बर ३८ गुल्म , रुपन्देहीले पहिलो आर्थिक वर्ष २०७५/०७६ को तीनमा महिना साउनदेखि असोजसम्म ९१ लाख ५८ हजार बढी मूल्य बराबरको राजश्व छली गरेर भित्र्याइएको विभिन्न अवैध समाग्री नियन्त्रणमा लिएर राजश्व अनुसन्धान र भन्सार कार्यालयमा बुझाएको जनाएको छ ।
प्रतिक्रिया दिनुहोस !
