अछाम : चौरपाटी गाँउपालिकाले कैलालीको अत्तरियादेखि गाउँपालिकासम्म बस सेवा सञ्चालन गर्ने भएको छ । चौखुट्टे –चौरपाटी– पायल–चित्रे सडकको स्तरोन्नति गरी मंसिर १५ गतेभित्र बस र मालवाहक ट्रक सञ्चालनमा ल्याउने गाउँपालिका अध्यक्ष हर्कबहादुर साउँदले जानकारी दिए ।
सडकको स्तरोन्नतिका लागि शनिबार उपभोक्ता समिति गठन गर्ने क्रममा अध्यक्ष साँउदले जनतालाई सहज रुपमा सेवा प्रदान गर्न बस सेवा सञ्चालन गर्न लागिएको बताए ।
उनले भने, ‘चौखुट्टे –चौरपाटी– पायल–चित्रे सडकको स्तरोन्नतिको काम ठेकेदारमार्फत गराइने छ , कामको गुणस्तरियता रेखदेख तथा अनुगमनको जिम्मा उपभोक्ता समिति गठन गरेर दिएका छौं । काम पूर्णरुपमा सम्पन्न भए मात्र अन्तिम भूक्तानी दिइने छ ।’
गाँउपालिकामा बस र ट्रक सञ्चालनमा आए गाँउपालिकाको पायल, लुंग्रा, सिउडी, सोकटका साथै डोटीको पोखरी लगायतका स्थानीयवासीलाई सहज हुने अध्यक्ष साँउदले बताए ।
उनले गत वर्षका उपभोक्ता समितिको कार्य सन्तोषजनक नभएको भन्दै यो आर्थिक वर्षका योजनालाई प्रभावकारी ढंगबाट सञ्चालन गर्नका लागि काम गर्न सक्ने उपभोक्ता समितिलाई मात्र जिम्मा दिने जानकारी दिए । सडकको स्तरोन्नतिका लागि चेतमान बोगटीको अध्यक्षतामा ७ सदस्यीय उपभोक्ता समिति गठन गरिएको छ ।
प्रतिक्रिया दिनुहोस !
