काठमाडौं : अन्य दिनको भन्दा शुक्रबार नेपाल आइडलको २२औं भाग विशेष रह्यो । नेपाल आइडल सिजन–१ का विजेता बुद्ध लामा, फस्ट रनरअप निशान भट्टराई र सेकेन्ड रनरअप प्रताप दास अतिथिका रूपमा कार्यक्रममा उपस्थित थिए ।
कार्यक्रमको सुरुआतमा क्रिसल कँडेल र जस्मिन लिम्बूले सुमधुर आवाजमा ‘सुन... भनन’ बोलको गीत संयुक्त रूपमा गाएका थिए । उनीहरूको प्रस्तुतिको बीचमा टुप्लुक्क आइपुगे निशान भट्टराई । उनले जस्मिन र क्रिसललाई गीत गाउन साथ दिए । साथै आफूलाई नेपाल आइडलको मञ्चले संसारभर चिनाउने अवसर दिएकोमा नेपाल आइडलको प्रशंसा गरे । उनले अर्को गीत पनि गाएर जजको मन पुनः जिते । जजहरू इन्दिरा जोशी, कालीप्रसाद बास्कोटा र न्ह्यु वज्राचार्यले मुक्तकण्ठले उनको प्रशंसा गरे ।
रमाइलो माहोलमा कार्यक्रम चलेको थियो । दोस्रो प्रस्तुतिका लागि मञ्चमा उपस्थित थिए, कञ्चनपुरका रवि ओड र पोखराका विक्रम बराल । ‘वारि जमुना पारि जमुना’ बोलको गीत उनीहरूले निकै भव्यताका साथ उठान गरेका थिए । दौरा सुरुवाल र ढाका टोपीमा सजिएका उनीहरूको प्रस्तुति दमदार थियो । त्यही बीचमा हल्का खोकी लागेको अभिनयसहित सुटुक्क आइपुगे प्रताप दास । दासले विक्रम र रविसँगै गीत गाएर कार्यक्रमको रौनक बढाए ।
नेपाल आइडलको सिजन–२ मा निकै अब्बल प्रतियोगी आएकोमा आफू खुसी भएको प्रतापले बताए । अहिलेका प्रतियोगीको क्षमताबारे बोल्न आफूमा कुनै शब्द नभएको बताउँदै उनले निकै विनम्रता दर्शाए । । सोही अवसरमा प्रतापले गायिका तथा नेपाल आइडलकी जज इन्दिरा जोशीसँग ‘मोटरसाइकलमा’ बोलको गीत गाउन भ्याए । उनीहरूको प्रस्तुतिमा दर्शक र जज निकै झुमिरहेका थिए । सबै उठेर ताली पिटिरहेका थिए । यस्तो लाग्थ्यो, कार्यक्रममा उपस्थित सबैजना गीत सुनेर आफ्ना सबै दुःख भुल्ने प्रयासमा छन् ।
‘जिन्दगी हाम्रो बगेको खोला फेरि भेट हाम्रो होला कि नहोला’ बोलको गीत गाउँदै मञ्चमा देखा परे, सुर्खेतका सुबिन सिंह र दोलखाका पवन गिरी । बिहीबारको कार्यक्रममा जजहरूको निकै तारिफ पाएका पवन र सुबिनको यो प्रस्तुति पनि निकै दमदार थियो । हातमा माइक समाएर गीत गाउँदै यही गुप्रमा मिसिए, नेपाल आइडल सिजन–१ का टाइटल विजेता बुद्ध लामा । उनको उपस्थितिले कार्यक्रमको माहोल झन् तातिँदै थियो । यसैगरी अस्मिता अधिकारी, अमित बराल, नीलिमा थापा र सुमित पाठकले पनि उत्कृष्ट प्रस्तुति दिए । उनीहरू कोहीभन्दा कोही कम थिएनन् । जोकोहीले सजिलै अनुमान लगाउन सक्थे, हरेक प्रतियोगी टाइटल विजेताका दाबेदार हुन् । उनीहरूलाई अब्बल गाउनु छ र जित्नु छ एउटा टाइटल अनि बनाउनु छ उत्कृष्ट परिचय ।
‘मन जित्छ उसले, राम्रो गाउँछ जसले’ नाराका साथ नेपाल आइडल सिजन–२ गत साउन २४ देखि सुरु गरिएको हो । नेपाल आइडलका च्यानल हेड लक्ष्मीप्रसाद पौडेल हुन् भने प्रोजेक्ट हेड सुरेश पौडेल छन् । कार्यक्रम निर्देशकहरू सुरेश पौडेल, लोकेश वज्राचार्य र एलन श्रेष्ठ छन् ।
बाहिरिइन् जस्मिन
धरानकी जस्मिन लिम्बू शुक्रबार नेपाल आइडल–२ को टप टेनबाट बाहिरिएकी छन् । उनले अघिल्लो हप्ता वाइल्ड कार्डमार्फत कार्यक्रममा पुनः इन्ट्री पाएकी हुन् । बिहीबारको गाला राउन्डमा उनले ‘तिम्रो लागि सारा संसार भुलाइदिन्छु म’ बोलको गीत गाएकी थिइन् । गायकीमा अलिकति सुर नमिलेको आरोप खेपेकी उनले प्रतिस्पर्धामा आफूलाई अब्बल साबित गर्न भने सकिनन् । शुक्रबारको इपिसोडमा पनि उनले क्रिसलसँगको संयुक्त प्रस्तुतिमा गायकीको तालमेल मिलाउन सकिनन् । वाइल्ड कार्डले कार्यक्रममा पुनः इन्ट्री पाएपछि उनले आफ्नो सपना पूरा गर्न फेरि अवसर पाएकाले निकै मेहनत गर्ने बताएकी थिइन् ।
प्रतिक्रिया दिनुहोस !
