नेपालगन्ज : नेपालगञ्ज उपमहानगरपालिका–४ कारकाँदोबाट प्रहरीले डेराको कोठालाई नै जुवा खाल बनाएर जुवा खेलिहेका चार जनालाई जुवाको खालबाट पक्राउ गरेको छ ।
वडा प्रहरी कार्यालय नेपालगञ्जबाट गएको टोलीले भक्तबहादुर श्रेष्ठको घरमा भाडामा बस्ने हेमा भुजेलको कोठामा जुवा खेलाइरहेको भेटेको थियो । सोही डेराको कोठामा रहेको जुवा खालबाट ७६ हजार ६ सय ३५ रुपैयाँ नगदसहित चार जनालाई नियन्त्रणमा लिएको हो ।
वडा प्रहरी प्रमुख प्रहरी निरीक्षक नारायण डाँगीले नेपालगञ्ज–१८ बस्ने रवि गिरी, रमित शाही, जयबहादुर चन्द र नेपालगञ्ज–४ बस्ने पूर्णबहादुर शाहीलाई नियन्त्रणमा लिएको हो ।
उनीहरुलाई कारवाहीका लागि जिल्ला प्रहरी कार्यालय बाँकेमा पठाइएको छ । चाडपर्वको मौका पारेर नेपालगञ्ज, खजुरा, कोहलपुरका केही होटल, होमस्टेलगायत ठाँउमा जुवाडेहरुको जमघट बढ्ने गरेको प्रहरीले बताएको छ । हरेक दिन जुवा खेलाइरहेको सुचना आए पनि पक्राउ गर्न जानुअघि नै जुवाडेहरु भाग्नाले पक्राउ गर्न अप्ठ्यारो भएको प्रहरीले बताउँछ ।
प्रतिक्रिया दिनुहोस !
