स्थानीय तहका भ्रष्टाचारमा निरगानी बढाउँदै अख्तियार
कात्तिक १९, २०७५ सोमबार १२:५४:०
महेन्द्रनगर : अख्तियार दुरुपयोग अनुसन्धान आयोगका प्रमुख आयुक्त नवीनकुमार घिमिरेले स्थानीय तहमा भइरहेको अनियमितता र भ्रष्टाचारको अनुसन्धान सुक्ष्म रुपले अघि बढाएको बताएका छन् ।
कञ्चनपुरस्थित अख्तियार दुरुपयोग अनुसन्धान आयोगको नवनिर्मित कार्यालय भवन उद्घाटन समारोहमा बोल्दै प्रमुख आयुक्त घिमिरेले यस्तो बताएका हुन् । उनले अहिले आयोगमा सबैभन्दा धेरै उजुरी स्थानीय तहमा भएको अनियमितता र भ्रष्टाचार सम्बन्धि परेको बताए ।
‘स्थानीय तहमा भएका अनियमित क्रियाकलाप, भ्रष्टाचारका क्रियाकलापका उजुरी धेरै संख्यामा परेका छन्’ प्रमुख आयुक्त घिमिरेले भने, ‘आयोगको कार्यालयले ७ वटै प्रदेशमा परेका उजुरीको सुक्ष्म र गहन रुपले अनुसन्धान गरिरहेको छ ।’
घिमिरेले आयोगले ७ वटै प्रदेशका नगरपालिका र गाउँपालिकाका प्रमुख, उपप्रमुख र प्रशासकीय अधिकृतहरुलाई राखेर सार्वजनिक खरिद प्रक्रिया लगायतका विभिन्न विषयमा जानकारी गराएको समेत बताए । आयोगले अहिले वडा तहसम्म समेत कार्यक्रम लैजाने विषयमा अर्थमन्त्रालयसँग समन्वय र छलफल गरिरहेको उनको भनाइ थियो ।
‘स्थानीय तह कानुन निर्माणको प्रक्रियामा छन्, तर यो होइन कि संक्रमण छ भनेर भ्रष्टाचार त गर्न मिल्दैन’ उनले भने, ‘कुनै पनि वहानामा भ्रष्टाचार गर्ने छुट कसैलाई छैन ।’
उनले स्थानीय तहको काम कारवाहीलाई नजिकबाट आयोगले हेरिरहेको भन्दै अझै अनुसन्धानको पाटोलाई बढाएर लैजाने बताए । भ्रष्टाचार न्युनिकरणको विषय अब अख्तियारको विषय मात्रै नभई आम नागरिक, पत्रकार लगायत सबैको विषय भएकाले सुशासन र पारदर्शिताका लागि सबै सजग हुनुपर्ने घिमिरेको आग्रह थियो ।
‘आयोगले अवलम्बन गरेको नीति पहिले थुन अनि सुन हो’ उनले भने, ‘अब त्यो मात्रै होइन पहिले सुन्ने अनि थुन्ने पनि नीति कायम भइरहेको छ ।’ ठेक्का होल्ड गर्ने र काम नगर्ने, सम्पर्कमा नै नआउने लगायत प्रवृति निर्माण व्यवसायमा देखिएकाले केही विकास निर्माणका कामको अनुसन्धान भइरहेको पनि प्रमुख आयुक्त घिमिरेले बताए ।
कार्यक्रममा बोल्दै आयोगका सचिव महेश्वर न्यौपानेले आयोगका हरेक काम प्रविधि मैत्री बनाएर अनुसन्धान र काम कारवाही अघि बढाउने बताएका थिए । भाडाको घर लिएर कार्यालय सञ्चालन हुँदै आएको आयोगको अब आफ्नै कार्यालय बनेको हो । २०७१ फागुन १८ मा ठेक्का सम्झौता भइ सुरु भएको भवन निर्माणको काम गत वर्ष चैत ३० गते निर्माण सम्पन्न भएको थियो । भवनको उद्घाटनसँगै आइतबारदेखि नै आयोगको कार्यालयले आफ्नो नयाँ भवनबाट काम थालेको कार्यालयले जनाएको छ ।
प्रतिक्रिया दिनुहोस !
