फिदिम : नेपालमै पहिलोपटक पाँचथरबाट राष्ट्रिय परिचयपत्र वितरण सुरु गरिएको छ । सोमबार एक कार्यक्रमबीच गृहमन्त्री रामबहादुर थापाले जिल्लाकै सबैभन्दा जेष्ठ १०१ वर्षीया भगवतीदेवी भण्डारीलाई परिचय पत्र वितरण गरेका हुन् । भण्डारीले परिचयपत्र प्राप्त गरेपछि गृहमन्त्री थापालाई पनि परिचयपत्र प्रदान गरेकी छन् ।
२०७४ भाद्र १९ गतेको सरकारी निर्णयानुसार पहिलोपटक पाँचथरका नागरिकलाई परिचयपत्र वितरण गरिएको हो । सोमबारदेखि सुरु परिचयपत्र वितरण निरन्तर चल्ने छ ।
पहिलो दिन पाँचथरका ५० जना नागरिकलाई परिचयपत्र वितरण गरिएको हो । पहिलो चरणमा पाँचथरका एक लाख १० हजार नागरिक र सिंहदरबारभित्र काम गर्ने कर्मचारीलाई परिचयपत्र वितरण गर्न थालिएको हो ।
परिचय पत्र एटिएम कार्ड जस्तै छ । व्यक्तिका सम्पूर्ण विवरण राख्न मिल्ने गरि परिचय पत्र बनाइएको छ । १० वटा अंक रहेको परिचयपत्रमा प्रत्येक व्यक्तिको नम्बर फरक रहने छ ।
नागरिकता लिएका र नागरिकता लिन योग्य व्यक्तिलाई परिचयपत्र वितरण गर्न थालिएको हो । दीर्घकालमा बच्चा जन्मनेबित्तिकै १० अंक भएको परिचयपत्र गरिने महानिर्देशक काफ्लेले जानकारी दिए ।
५० डिग्री सेन्टिग्रेटसम्मको तापक्रममा नपग्लने गरी बनाइएको परिचय पत्र पानीले पनि नभिज्ने र नकोरिने दाबी गरिएको छ । बायो मेट्रिक चिप्सको प्रयोग गरेर परिचयपत्र निर्माण गरिएको हो । परिचयपत्रमा धेरै विवरण अटाउन सकिने भएपछि सुरुमा वैयक्तिक विवरण (नाम, ठेगाना, पारिवारिक विवरण) र जैविक विवरण (फोटो र औँठाछाप) मात्रै राखिएको छ ।
परिचयपत्र वितरण कार्यक्रमलाई सम्बोधन गर्दै गृहमन्त्री थापाले पाँचथर मुलुककै भाग्यमानी जिल्ला भएको बताए । ‘पाँचथर समृद्धिको बाटोमा एक कदम अगाडि छ,’ थापाले भने ‘मुलुकलाई समृद्धितर्फ लैजाने अभियान अन्तर्गत राष्ट्रिय परिचयपत्र वितरण सुरु गरिएको हो ।’
नागरिकको सुरक्षाका लागि अत्याधुनिक परिचयपत्र वितरण गरिएको थापाको भनाई छ । कार्यक्रमलाई सम्बोधन गर्दै प्रदेश १ का मुख्यमन्त्री शेरधन राईले अब मुलुकले विस्तारै मुहार फेर्ने बताए ।
सरकारले एक पछि अर्को नयाँ र समय सुहाउँदो काम गर्दै जाने उनको भनाई थियो । ‘सरकाले केही नगरेजस्तो आम जनतालाई लागेको हुनसक्छ,’ राईले भने, ‘यसरी नै सरकारले नयाँ र परिणामुखी काम गर्दै जानेछ ।’
परिचय पत्र वितरण कार्यक्रममा गृहमन्त्री थापासहित प्रदेश १ का मुख्यमन्त्री राई, आर्थिक मामिला तथा योजना मन्त्री इन्द्र आङ्बो, प्रधामन्त्री कार्यालयका सचिव केदारबहादुर अधिकारी, गृहसचिव प्रेमकुमार राई र राष्ट्रिय परिचयपत्र तथा पञ्जीकरण विभागका महानिर्देशक दीपक काफ्लेसहित उपस्थित थिए ।
प्रतिक्रिया दिनुहोस !
