काठमाडौँ : पसलमा भएको चोरीमा संलग्नलाई पक्राउ गर्न भन्दै घुस लिने एक प्रहरी निरीक्षकविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ ।
इलाका प्रहरी कार्यालय, बाबियाचौर, सुर्खेतका प्रहरी निरीक्षक सुशोभन श्रेष्ठ र प्रहरी जवान तिलक लामिछानविरुद्ध अख्तियारले विशेष अदालतमा मुद्दा चलाएको हो ।
सुनचाँदी पसल चोरीमा संलग्न पक्राउ गर्न भन्दै उनीहरुले सेवाग्राहीबाट १५ हजार रुपैयाँ घुस लिइसकेको अवस्थामा अख्तियार दुरुपयोग अनुसन्धान आयोग सुर्खेतको टोलीले पक्राउ गरेको थियो ।
चोर समात्नका लागि मागेको घुस प्रहरी निरीक्षक श्रेष्ठले प्रहरी जवान लामिछानेलाई लिन लगाएका थिए । श्रेष्ठविरुद्ध भ्रष्टाचार निवारण ऐन, २०५९ को दफा ३ को उपदफा ९१० बमोजिम बिगोस्वरुप १५ हजार कायम गरी विशेष अदालतमा आरोपपत्र दायर गरिएको अख्तियारका प्रवक्ता रामेश्वर दंगालले जानकारी दिए ।
सहयोगीको भूमिका निर्वाह गरेका प्रहरी जवान लामिछानेले अनुसन्धानमा सहयोग गरेकाले भ्रष्टाचार निवारण ऐन, २०५९ को दफा ५५ बमोजिम साक्षीको रूपमा प्रस्तुत गरी सजायको मागदावीमा पूर्ण छुट दिइएको दंगालले बताए ।
प्रतिक्रिया दिनुहोस !
