ओखलढुंगा : ओखलढुंगाको दुर्गम गाउँपालिका खिजीदेम्वामा नापी कार्यालय स्थापना भएको दुई वर्षसम्म पनि सेवा दिन सुरु भएको छैन । दुर्गममा सेवा प्रवाह सहज पुर्याउने उद्देश्यले कार्यालय स्थापना भए पनि भौतिक पूर्वाधार र कर्मचारी अभाव भन्दै सेवा सुरु गरिएको छैन ।
नापी सेवा कहिलेदेखि सुरु गर्ने भन्नेबारे पनि अन्योल नै छ । भौतिक संरचना र कर्मचारी टुंगो नलागेसम्म सेवा सुरु गर्न कठिन रहेको बताइन्छ । साथै नापी कार्यालयको संरचना संघीय मातहत रहने की प्रदेश भन्ने पनि टुंगो लागेको छैन ।
यही कारण पनि सेवा सुरु हुन नसकेको बताउँछन् संघीय सांसद यज्ञराज सुनुवार । सुनुवारले आफू पहिलो पटक सांसद निर्वाचित भएदेखि खिजीदेम्वामा इलाका स्तरका कार्यालय राख्न पहल गरिरहेको भए पनि नापी संचालनमा ल्याउन कठिन भएको बताएका छन् ।
मालपोत कार्यालय सुरु
मालपोत कार्यालयले भने स्थापना भएको दुई वर्षपछि सेवा दिन थालेको छ । दुई महिनाअघि कार्यालय प्रमुख तोकिएपछि यही हप्ताबाट मालपोत कार्यालयले सेवा सुरु गरेको हो ।
जिल्ला मालपोत कार्यालयबाट नायव सुब्बा राजन दाहाललाई कार्यालय प्रमुख तोकिएको छ । इलाका प्रशासन कार्यालयमा पनि अधिकृत स्तरको कर्मचारी छैनन् । नागरिकता वितरण समेत नासु स्तरकै कर्मचारीबाट भइरहेको छ । प्रतिलिपी निकाल्न भने जिल्ला सदरमुकाममै धाउनु पर्छ ।
प्रतिक्रिया दिनुहोस !
