महेन्द्रनगर : निर्मला पन्तको न्यायका लागि दोस्रो चरणको आन्दोलन सुरु गरेको नागरिक संघर्ष समितिले शनिबार महेन्द्रनगरमा सार्वजनिक यातायातमा निर्मलाको फोटोसहितको पोस्टर टाँसेको छ । पोस्टरमा ‘सरकार भेटियो, न्याय भेटिएन’ लेखिएको छ ।
कञ्चनपुर सदरमुकाम महेन्द्रनगरस्थित बसपार्क क्षेत्रमा भेला भएका अधिकारकर्मीले बसपार्कबाट बाहिरिने सबै बसमा पोस्टर टाँसेका हुन् । बसमा पोस्टर टाँस्न खोज्दा बसका केही कर्मचारीले रोकेका थिए भने केहीले उक्काएका थिए ।
बसपार्कमा नेपाल-भारत मैत्री बस सेवा उद्घाटन समारोह चलिरहँदा केहीबेर त्यहाँसमेत निर्मलाको फोटो अंकित पोस्टरसहित अधिकारकर्मीले धर्ना दिएका थिए । ‘हामीले आफ्नो आन्दोलनको कार्यक्रमअन्तर्गत शनिबार सार्वजनिक यातायातमा पोस्टर टाँसेका हौं’, नागरिक संघर्ष समितिका संयोजक मीना भण्डारीले भनिन्, ‘ निर्मलाका हत्यारा सार्वजनिक भई न्याय नपाएसम्म आन्दोलन रोकिँदैन ।’
२३ गते तराजु, राष्ट्रिय झन्डासहित आँखामा कालोपट्टी बाँधेर २ घण्टा धर्ना दिने, २४ गते प्रशासन कार्यालय र २५ गते मुख्यमन्त्री कार्यालयबाहिर निर्मलाको शव बनाएर धर्ना दिने र २६ गते बिहान प्रभातफेरीसहित प्रशासन कार्यालयबाहिर होम गर्ने समितिका कार्यक्रम छन् । छोरीका हत्यारा सार्वजनिक गर्न माग राखेर आमाबुवाले कात्तिक २५ गतेदेखि सुरु गरेको अनिश्चितकालीन धर्ना भने जारी छ ।
प्रतिक्रिया दिनुहोस !
