महेन्द्रनगर : कञ्चनपुर सदरमुकाम महेन्द्रनगरदेखि भारतको उत्तराखण्ड राज्यको राजधानी देहरादुनसम्म शनिबारदेखि बस सेवा सुरु भएको छ । सुदूरपश्चिम प्रदेश सरकारका उद्योग, पर्यटन तथा वन र वातारण राज्यमन्त्री प्रकाश रावल र भारतको उत्तराखण्ड राज्यको खटिमा क्षेत्रका विधायक पुष्करसिंह धामीले संयुक्त रूपमा बस सेवा उद्घाटन गरेका हुन् ।
मैत्री बस सेवा उद्घाटन गर्दै राज्यमन्त्री रावलले भने, ‘भारतका पर्यटक नेपाल आउन र नेपालका पर्यटक भारतसम्म जान अब निकै सहज हुनेछ ।’ उनले सीमामा आउजाउ गर्ने मानिसले भोग्दै आएका समस्या पनि बस सेवाले केही कम हुने बताए । उद्घाटन समारोहमा खटिमा क्षेत्रका विधायक धामीले दुई देशबीच मैत्रीपूर्ण बस सेवा सञ्चालन एक कोसेढुंगा सावित हुने भन्दै आफ्नो तर्फबाट आवश्यक सबै सहयोग गर्न तत्पर रहेको बताए ।
नेपाल-भारतबीच सन् २०१४ मा भएको नेपाल-भारत मैत्री सेवा सम्झौताअनुरूप बस सेवा सुरु भएको हो । भारतको उत्तराखण्ड परिवहन निगमले र महेन्द्रनगरमा महाकाली यातायात बस व्यवसायी कम्पनी प्रालिले बस सञ्चालनको अनुमति पाएका हुन् । महेन्द्रनगरदेखि हरेक दिन भारत र नेपालको एक÷एकवटा बस देहरादुन प्रस्थान गर्नेछन् र सोही रुट भएर २ वटा बस फर्किनेछन् । महेन्द्रनगरदेखि ना.७ ख ३४३२ नम्बरको बस शनिबार देहरादुनका लागि प्रस्थान गरेको छ । भाडादर भने ६ सय ४० भारतीय रुपैयाँ तोकिएको छ।
प्रतिक्रिया दिनुहोस !
