दाङ : पत्रकारहरुको एक संस्थाले तिहारमा भैलो खेलेर संकलन भएको रकमबाट जिल्लामा रहेको एक मदरसाका विद्यार्थीलाई न्यानो कपडा सहयोग गरेको छ ।
‘क्रियाशील पत्रकार संघ, दाङ’ले तिहारमा भैलो खेलेर संकलन गरेको ४० हजार रुपैयाँ मुस्लिम समुदायद्वारा दाङको शान्तिनगरस्थित अमुवामा सञ्चालित मदरसामा अध्ययनरत विद्यार्थीहरुलाई सहयोग गरेको हो ।
शान्तिनगर गाउँपालिका–२ अमुवामा रहेको मदरासामा सोमबार एक औपचारिक कार्यक्रमको आयोजना गरी विपन्न र गरिब बालबालिका अध्ययनरत मदरसामा सहयोग गरिएको हो ।
मदरसाका विद्यार्थीहरुलाई न्यानो कपडा (ट्रयाक सुट र टिसर्ट) प्रदान गरेको हो । ४० हजार रुपैयाँ बराबर ४४ सेट न्यानो कपडा मदरसाका विद्यार्थीहरुलाई प्रदान गरिएको संघले जनाएको छ ।
मदरसाका प्रधानाध्यापक अब्दुल सतारले मदरसामा पहिलो पटक सहयोग आएको भन्दै बिपन्न बालबालिकालाई राहात पुगेको बताए । ९७ बालबालिका अध्ययनरत विद्यालयमा केही हिन्दुका विद्यार्थी पनि रहेको उनले बताए ।
प्रतिक्रिया दिनुहोस !
