प्रधानन्यायाधीश भन्छन् : अदालतमा भ्रष्टाचार भयो भनेर मात्रै हुँदैन, प्रमाण पनि दिनू
बनियानी (झापा) : प्रधान न्यायाधीश ओमप्रकाश मिश्रले अनावश्यक टिप्पणीले न्यायालय कमजोर हुने बताएका छन् ।
'अदालतमा विकृति मौलायो, भ्रष्टाचार भयो भनेर मात्रै हुँदैन, कसले कहाँ कति लियो, त्यो पनि उजुरी गर्नुपर्छ', नेपाल बार एशोसिएशनले गरेको मानवअधिकारसम्बन्धी राष्ट्रिय सम्मेलनको उद्घाटन गर्दै प्रधान न्यायाधीश मिश्रले भने । न्यायालयलाई विकृतिमुक्त बनाउने अभियानमा सबैको सहयोग आवश्यक रहेको उनले बताए ।
न्यायपालिकाको स्वतन्त्रता र निर्भिकताका लागि नेपाल बार एशोसिएशनको भूमिका प्रभावकारी हुनुपर्नेमा समेत उनले जोड दिए। प्रदेश नं १ का आन्तरिक तथा कानूनमन्त्री हिक्मत कार्कीले न्यायालयलाई अझै जिम्मेवार र जवाफदेही बनाउन सकिए मात्रै जनताले न्यायको अनुभूति गर्न सक्ने बताए ।
बार एशोसिएशनका अध्यक्ष शेरबहादुर केसीले न्यायाधीश र कानून व्यवसायी सच्चिने भए ७५ प्रतिशत भ्रष्टाचार कम हुने दाबी गरे । एशोसिएशन झापाको संयोजनमा भएको सम्मेलनमा देशभरका एक हजार कानून व्यवसायीको सहभागिता रहेको थियो । सम्मेलन सातबुँदे झापा घोषणापत्र जारी गरेको एशोसिएशन झापाका अध्यक्ष सुरज खत्रीले बताए । रासस