अपहरित बालकको उद्धार गर्न भारतीय प्रहरी नेपालमा, तीन पक्राउ
दमक : भारतको बिहारबाट अपहरण गरी बन्धक बनाइराखेको अवस्थामा झापाको दमकबाट एक बालकको प्रहरीले उद्धार गरेको छ । बालककाे उद्धारसँगै तीन अपहरणकारी पक्राउ परेका छन् ।
१५ लाख रुपैयाँ फिरौती माग गर्दै बालकलाई बन्धक बनाएर राख्ने झापाको गौरिगञ्ज–४ बस्ने २७ वर्षीया अञ्जुदेवी मुखियालाई प्रहरीले पक्राउ गरेको हो । इलाका प्रहरी कार्यालय दमकका प्रहरी निरीक्षक खगेन्द्र एक्तेनका अनुसार भारतको बिहारस्थित सुपोल जिल्ला बस्दै आएका ७ वर्षीय बालक महफुज आलमको मंगलबार सकुशल उद्धार गरिएको हो ।
आलम ५ दिनअघि अपरहणमा परेका थिए । उनका बुवा मोहमद सदामका अनुसार मंसिर २० गते आलम मावली घरमा खेलिरहेको अवस्थामा अपहरणमा परेका हुन् । दुईजना आफन्तले मोटरसाइकलमा हालेर प्रतापगञ्ज भन्ने ठाउँसम्म पुर्याएको प्रहरी अनुसन्धानले देखाएको छ । प्रहरीले ती दुईजनाको नाम नखुलाए पनि बच्चालाई अपहरणकारीसम्म पुर्याउन बालककै आफन्त १५ वर्षीय मोहम्मद दिलसादले भूमिका खेलेका थिए ।
खेलिरहेको अवस्थामा कडिया भन्ने व्यक्तिले बालकलाई ‘तिम्रो आन्टीको घर पु्र्याइदिन्छु’ भनी लिएर गएका थिए । त्यसपछि अलि पर पुगेपछि अर्काे नाता पर्ने अर्का व्यक्ति मोहमद दिलसादको मोटरसाइकलमा बीचमा राखी भारतको प्रतापगंञ्जसम्म लगेर बालकले नचिनेको मानिस बिट्टु भनिने श्री प्रसाद मुखियालाई जिम्मा लगाएका थिए ।
बिट्टुलाई बालकको जिम्मा लगाएर ‘उहाँले आन्टीकोमा पुर्याइदिनु हुन्छ’ भनी दिलसाद र कडिया फर्किएका थिए । त्यसपछि बालक आलमलाई बिट्टुले अपहरण गरी सिधै नेपाल ल्याएको बुझिएको छ ।
बच्चा खोज्दै भारतीय प्रहरी नेपालमा
पारिवारिक स्रोतका अनुसार २१ गते अपहरणकारीले टेलिफोनमार्फत् भारतीय रुपैयाँ १५ लाख फिरौती माग गरेको थियो । बालकको मामालाई फोन गर्दै, ‘तेरो बच्चा मेरो साथमा छ, १५ लाख रुपैयाँ फिरौती लिएर आउनू’ भन्दै फोन आएको थियो ।
अपहरणकारीले प्रहरीलाई खबर गरे बच्चाको ज्यान मार्ने धम्कीसमेत दिएको थियो । त्यसपछि बालकका आफन्त भारतीय प्रहरी समक्ष पुगेका थिए । सोमबार बेलुका भारतको बिहारबाट आएको प्रहरी टोलीले शंकास्पद ठाँउमा खोजतलास गरेको थियो ।
पीडितका आफन्तसहित आएको प्रहरीले अपहरणमा संलग्नको खोजी गर्दै गौरीगन्ज पुगेको थियो । इलाका प्रहरी कार्यालय दमकसँगको सहकार्यमा संयुक्त टोलीले मंगलबार बिहान दमक–५ गोर्खाली टोलस्थित देउराली होटलको कोठा नम्बर १०७ बन्धक बनाएर राखिएको अवस्थामा बालकको उद्धार गरेको हो ।
प्रहरी निरीक्षक एक्तेनका अनुसार मुखियाकै बयानका आधारमा गौरिगञ्ज–६ खजुरगाछी बस्ने ४७ वर्षीय बद्री यादव र वडा नम्बर ४ का बिट्टु भनिने ३१ वर्षीय श्रीप्रसाद मुखियालाई गाउँमै लुकिछिपी बसेको अवस्थामा पक्राउ गरिएको थियो ।
उद्धार गरिएका बालकको स्वास्थ्य परीक्षण गराइ परिवारको जिम्मा लगाइएको छ । उनीहरुले फिरौती रकम असुल्ने उद्देश्यले नै अपहरण गरेको हुनसक्ने प्रहरीको आशंका छ । अपहरणमा परेका बालकलाई नेपाल–भारत सीमास्थित गौरीगञ्ज नाकाबाट नेपाल ल्याइएको खुलेको छ ।
पक्राउ परेका तीनजनाविरुद्ध बुधबार मुलुकी ऐन आचार संहिता २०७४ को अपहरण तथा शरीर बन्धक कसुर अन्तरगत मुद्दा दर्ता गरिएको इलाका प्रहरी कार्यालय दमकले जनाएको छ । बुधबारै पाँच दिनको म्याद थप गरी अभियुक्तविरुद्ध अनुसन्धान सुरु गरिएको इप्रका दमकका प्रमुख प्रहरी नायव उपरीक्षक श्यामल सुब्बाले जानकारी दिए ।
अपहरण अन्यको पनि संलग्नता हुनसक्ने आशंका गरिएको छ । यसबारे आवश्यक अनुसन्धान जारी रहेको सुब्बाले बताए । मुलुकी ऐन आचार संहिता २०७४ अन्तरगत अपहरण तथा शरीर बन्धक बनाउने कसुर ठहरेमा १० देखि १५ वर्षसम्म र १ लाखदेखि १ लाख ५० हजार रुपैयाँसम्म जरिवाना सजायको व्यवस्था छ ।