कमल थापाको निचोड : प्रधानमन्त्री केपी ओली एक वर्षमै निरीह र लाचार

नेपालगन्ज : राष्ट्रिय प्रजातन्त्र पार्टीका अध्यक्ष कमल थापाले धर्म परिवर्तन गराउनेलाई राज्यले संरक्षण गरेर बढावा दिइरहेको आरोप लगाएका छन् । राप्रपाको प्रदेश नं. ५ स्तरीय कार्यकर्ता प्रशिक्षण कार्यक्रमलाई मंगलबार नेपालगन्जमा सम्बोधन गर्दै अध्यक्ष थापाले धर्म परिवर्तन गराउनेलाई संरक्षण गरेर सरकारले धार्मिक द्वन्द्व निम्त्याउन खोजेको पनि जिकिर गरे । 

‘धर्म परिवर्तन अहिले महारोग भइसकेको छ । योजनाबद्ध र संगठित रुपमा दशौं लाखको संख्यामा धर्म परिवर्तन गराइएको छ’, उनले भने, ‘युनिफिकेसन चर्च जस्तो विवादित संस्थाको कार्यत्रममा सरकारको तामझामयुक्त सहभागिताले धर्म परिवर्तनलाई प्रोत्साहित र संरक्षण गरेको छ ।’ 

उनले केपी ओली नेतृत्वको सरकार वर्ष दिन नपुग्दै असफल भइसकेको पनि दाबी गरे । प्रधानमन्त्री ओलीले गलत प्रवृत्तिविरुद्ध निरीह साबित भएको जिकिर गर्दै उनले भने, ‘केपी जीको नियतमाथि म शंका गर्न चाहन्न । उहाँमा राष्ट्रवादी भावना र केही गरौं भन्ने चाहना छ । तर आज देशको घटनाक्रम हेर्दा ओलीजी पनि निरीह र लाचार भएको देखिन्छ ।’ 

उनले भने, ‘राज्य संयन्त्रले अपराधीहरुलाई संरक्षण गरेकै कारण सुनकाण्ड र निर्मलाको बलात्कारपछि हत्याकाण्ड त्यसै सेलाएर गएको हो । सुनकाण्ड र निर्मला हत्या काण्डमा सरकारमा रहेका व्यक्ति र उनीहरुसँग निकट सम्बन्ध भएकाहरु जेडिन थालेपछि यि सबै विषय सेलाएर गएको प्रष्ट भइसकेको छ ।’ 

फागुन ७ गतेदेखि हिन्दू राज्य पुनःस्थापना लगायतका मागसहित संघर्षमा जाने पनि बताए । त्यसअघि सबै स्थानीय तहमा जनजागरण अभियान, घरदैलो अभियान र मेची–महाकाली राष्ट्रिय स्वाभिमान यात्रा गरिने पनि थापाको भनाइ थियो ।