मेचीनगर : लिम्बू जातिको महान चाड चासोक तङ्नामको अवसरमा झापाको मेचीनगर–५ अँधेरीमा वृहत सांगीतिक तथा सांस्कृतिक कार्यक्रम आयोजना भएको छ ।
किरात याक्थुङ् चुम्लुङ, मेचीनगर–५ ले आयोजना गरेको कार्यक्रममा गायक तथा संगीतकार ताराप्रकास लिम्बूले ‘हारेँ हारेँ’, ‘बेबी आई लभ यु’ लगायत आफ्ना चर्चित गीत प्रस्तुत गर्दा स्थानीय दर्शकहरुले नाचेर साथ दिए ।
गायक भीषण मुकारुङले पछिल्लो समय चर्चित लोकशैलीको गीत ‘खोर्सानी डल्ले’ गाउँदा स्रोता दर्शकले सँगै गाउँदै नाचे । उनले ‘अँधेरीमा जुन फुल्दा’ लगायत आफ्ना गीत सुनाएका थिए । गायक उत्तमजंग लिम्बूले आफ्नो स्वर र संगीत रहेका गीतहरु गाए भने गायिका अनु चौधरीका गीतमा पनि दर्शक झुमेका थिए ।
कार्यक्रममा काउली बुढी (सन्ध्या बुढा) र फुलेन्देको बाउ (मौसम इम्बुङ)को प्रस्तुती दर्शकका लागि विशेष बन्यो । नेपाल आइडलको सिजन–२ मा सहभागी बनेपछि चर्चामा आएकी काउली बुढी र सामाजिक सञ्जालबाट चर्चामा आएका हङकङ बस्ने फुलेन्देको बाउको प्रस्तुती हेर्न स्थानीय दर्शकहरु आइतबार मध्यरातसम्म फर्केर बसेका थिए ।
उनीहरुको हाँस्य प्रस्तुतीमा दर्शकहरुले खुब मनोरञ्जन लिए । कार्यक्रममा गीतकार किरण टी लिम्बूले संगीत र कलासंस्कृतिका बारेमा बोले । मेचीनगरका स्थानीयले हरेक वर्ष चासोकलाई भव्य रुपमा मनाउने गरेको आयोजकले जनाएको छ । चासोकको अवसरमा मेला समेत लगाइएको छ ।
प्रतिक्रिया दिनुहोस !
