निर्मला हत्या प्रकरण : पक्राउ गरी यातना दिँदा पनि नगरपालिका माैन रहेकाे भन्दै धर्ना
पुष १२, २०७५ बिहीबार १८:२७:०
महेन्द्रनगर : बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तका हत्यारा सार्वजनिक गर्न माग राख्दै बिहीबार नगरपालिकामा पनि धर्ना दिइएको छ ।
निर्मलाका हत्यारा सार्वजनिक हुनुपर्ने माग राखेर चरणबद्व आन्दोलन गरिरहेको नागरिक संघर्ष समितिको अगुवाइमा धर्ना दिइएको हो । भीमदत्त नगरपालिकाको मुलगेटमा अधिकारकर्मीहरुले आज दुई घण्टा धर्ना दिएका हुन् ।
‘पूर्व निर्धारित कार्यक्रम अनुसार हामीले नगरपालिकामा धर्ना दिएका हौँ’ नागरिक संघर्ष समितिका संयोजक मिना भण्डारीले भनिन्, ‘नगर क्षेत्रकै किशोरहरुलाई प्रहरीले जबरजस्ती यातना दिने काम गरिरहेको छ । यसबारे स्थानीय सरकारले पनि बोल्नुपर्छ भन्ने ठानेर धर्ना दिएका हौँ ।’
प्रहरीले स्थानीयलाई पक्राउ गर्दै यातना दिन थालेपछि स्थानीय सरकारले यसबारे कुनै भुमिका नखेलेपछि नगरपालिकामा धर्ना दिएको उनीहरु बताउँछन् । बिहीबार दिउसो नागरिक अगुवाले नगरपालिकामा २ घण्टा धर्ना दिएका थिए ।
प्रहरीले अनुसन्धान गर्नुको साटो गरिब, निमुखा र असहायलाई दुःख दिने काम गरिरहेको अधिकारकर्मी शारदा चन्दको आरोप छ । ‘हाम्रो माग भनेकै निर्मला पन्तका बलात्कारी र हत्यारा पक्राउ गर भन्ने हो’ उनले भनिन्, ‘वास्तविक हत्यारा पत्ता लगाउनुको साटो प्रहरीले एकपछि अर्को गल्ति गरिरहेको छ ।’
निर्मला प्रकरणमा नागरिक संघर्ष समितिको अगुवाईमा चरणबद्व आन्दोलनका कार्यक्रम भइरहेका छन् । छोरीका हत्यारा सार्वजनिक गर्न माग राखेर निर्मलाका बुवाआमा समेत कात्तिक २५ गतेदेखि जिल्ला प्रशासन कार्यालयको मुलगेट बाहिर अनिश्चितकालिन धर्नामै छन् ।
कञ्चनपुरको भीमदत्त नगरपालिका–२ उल्टाखामकी १३ वर्षीया बालिका निर्मलालाई गत साउन १० गते बलात्कारपछि हत्या गरेको भए पनि प्रहरीले अहिलेसम्म दोषी पत्ता लगाउन सकेको छैन ।
प्रतिक्रिया दिनुहोस !
