निर्माणस्थलमा बिग्रेको मेसिन र सुपरभाइजर छन्, वडाध्यक्षलाई नै थाहा छैन !
पुष १४, २०७५ शनिबार १६:४:०
ताप्लेजुङ : ताप्लेजुङको आठराईत्रिवेणी र पाँचथरको हिलिहाङ गाउँपालिका जोड्ने तमोर नदीको पुल ‘लिम्बूनी पुल’ निर्माण सम्झौता गरिएको एक वर्ष भइसक्यो ।
जुन पुल चीन र भारत जोड्ने तमोर करिडोर अन्तरगत योजना हो । १८ करोड ५० लाख लागतमा ३२ महिनामा सक्ने गरी सपना याक्थुङहाङ जेभी निर्माण कम्पनीले पुलको जिम्मा लिएको थियो ।
तर अहिलेसम्म पुलको एक तर्फको जग खन्न मात्रै सुरु गरिएको छ । निर्माणस्थलमा एकजना सुपरभाइजर र एउटा स्काभेटर मेसिन मात्रै छन् । योजनाको लागत, निर्माण सुरु र सम्पन्न गर्नुपर्ने अवधि लगायत सूचना समेटिएको सूचनापाटी समेत यहाँ राखिएको छैन । समस्या त के भन्, यहाँ राखिएको एउटा मेसिन पनि १५ दिनयता बिग्रेर थन्किएको छ ।
पुलको ताप्लेजुङपट्टीको भागमा वेस खन्न सुरु भए पनि पाँचथर खण्डमा काम भएकै छैन । पुल निर्माणको प्रगति हेर्दा स्थानीय निराश देखिन्छन् । अचेल त पुल बन्छ भन्नेमा विश्वास नै हराएको बताउँछन् स्थानीयहरु । निर्माण पक्षकै कामदारहरुका अनुसार अहिलेसम्मको काम पाँचदेखि सात प्रतिशत मात्रै हो । जब कि नदी घटेर सानो भएको अवस्थामा ३५ देखि ४० प्रतिशत काम भइसक्नुपर्ने उनीहरु नै स्वीकार गर्छन् ।
जनप्रतिनिधि नै भन्छन्, ‘थाहा छैन’
पुल निर्माण स्थलका वडा अध्यक्ष पूर्ण सिटौला यस कामका बारेमा आफूहरुलाई जानकारी नै नभएको दावी गर्छन् । सिटौलाका अनुसार निर्माण कम्पनीले पुल निर्माण स्थलको स्थानीय सरकारलाई जानकारी समेत गराएको छैन ।
सिटौलाले भने, ‘निर्माण गर्ने ठेकेदार को हो, कति लागत हो, स्टमेटको बारेमा स्थानीय सरकार बेखबर छ ।’ निर्माण क्षेत्रमा खोजी गर्दा जवाफदेही र जिम्मेवार मान्छे नभेटिएको सिटौलाको जिकिर छ ।
तमोर करिडोरकै दोभान पुल निर्माणमा ठेकेदारले १० वर्ष लगाएकाले यो पुलको पनि त्यही अवस्थामा पुग्ने हो कि भन्ने आशंका रहेको स्थानीय रविन लिम्बूको गुनासो छ ।
‘यहाँबाट नजिकैको दोभान पुल निर्माणमा लापरवाही भएको हामीले देखेका छौँ,’ निघुरादिनका स्थानीय डम्बर लिम्बू भन्छन्, ‘दोभानको भन्दा दोब्बर लागतको यो पुलको पनि त्यस्तै हालत हुने छनक देखिँदै छ ।’
सम्झौता अनुसार अबको १८ महिनामा वारी–पारी दुवैतर्फ पिलर उठाउने र माथिवाट ट्रष्ट लगाइसक्नुपर्ने हुन्छ । तर सम्बन्धित ठेकेदारले काम नै नगरेपछि स्थानीयहरु निराश छन् ।
स्थानीय रविन लिम्बूका अनुसार स्थानीयहरु अब स्थानीय सरकार र ठेकेदार पक्ष लगायत सरोकारवालाको ध्यानाकर्षण गराउने तयारीमा छन् । याक्थुङहाङ निर्माण कम्पनिका प्रबन्धक तेज कुरुङवाङले भने ढिलो गरी भए पनि काम सम्पन्न गर्ने बताउँछन् । काममा ढिलाइ हुनुको कारण मुलुककै अन्योल अवस्थालाई देखाउँछन् उनी ।
प्रतिक्रिया दिनुहोस !
