शिक्षा प्रणालीमा समस्या हुँदा विदेश पलायन बढ्यो : राष्ट्रपति भण्डारी

विराटनगर : राष्ट्रपति विद्यादेवी भण्डारीले शैक्षिक पूर्वाधारको कमी, साधन स्रोत अभाव, समयानुकुल पठन पाठनमा समस्या र प्रतिष्पर्धापूर्ण शैक्षिक कार्यक्रम लागु गर्न नसक्दा युवाहरु विदेश पलायन हुने क्रम बढेको बताएकी छन् ।

अध्ययनकै लागि विदेश पलायन हुनेको संख्या बढेका कारण भण्डारीले शैक्षिक केन्द्रहरुलाई साधान स्रोत र पूर्वाधारयुक्त बनाउनु पर्ने सुझाव दिएकी छन् । गुणस्तरीय र प्रतिष्पर्धी पठन पाठनको अभावले मुलुकको शिक्षा प्रणालीमा चुनौती थपिएको राष्ट्रपति भण्डारीको भनाइ छ ।

विराटनगरमा बिहीबार पूर्वाञ्चल विश्व विद्यालयको २५ औं वार्षिक उत्सव एवं रजत महोत्सवलाई सम्बोधन गर्दै भण्डारीले यस्तो बताएकी हुन् । नेपालमा शिक्षा प्रणालीमा चुनौती थपिँदा वैदेशिक रोजगारीका नाममा युवा विदेश पलायन हुनु परिरहेको उनले बताइन् ।

‘शैक्षिक केन्द्रहरुले गुणस्तरीय जनशक्ति उत्पादन गर्न नसकेकै कारण मुलुकको विकास हुन सकिरहेको छैन,’ राष्ट्रपति भण्डारीले भनिन् । साथै उपयुक्त शिक्षा नीति लागू गरेर उच्चतम प्रविधिका साथमा विश्व विद्यालयहरुले गुणस्तरीय जनशक्ति उत्पादनमा जोड दिनुपर्ने उनको भनाइ थियो ।

कार्यक्रममा शिक्षा, विज्ञान तथा प्रविधि मन्त्री गिरीराजमणि पोखरेलले जनताको अपेक्षा पूरा गर्न बहुआयामिक समृद्धिको विषयलाई आधुनिक शिक्षासँग जोड्नुपर्ने बताएका थिए । शिक्षाका माध्यमबाट आम नागरिकलाई शिक्षित गराएर राष्ट्र निर्माणमा लगाउने योजना सरकारले ल्याउने पनि उनको प्रतिवद्धता छ ।

पोखरेलले पारदर्शीता, जवाफदेहिता, निष्पक्षता र जनसहभागितालाई ध्यान दिँदै कुशल नागरिक उत्पादन गर्न आधुनिक शिक्षा प्रणालीलाई सदुपयोग गरिने पनि बताएका छन् ।

साथै शिक्षालाई सीप, सीपलाई श्रम र श्रमलाई समृद्धिसँग जोड्नुपर्ने पनि मन्त्री पोखरेलले बताए ।

राष्ट्रपतिलाई आफैँ पढेको क्याम्पसमा अभिनन्दन
राष्ट्रपति विद्यादेवी भण्डारीलाई उनैले पढेको विराटनगरस्थित महेन्द्र मोरङ आदर्श बहुमुखी क्याम्पसमा बिहीबार अभिनन्दन गरिएको छ । पूर्व विद्यार्थी र हाल देशको सर्वोच्च पदको नेतृत्व गर्न सफल भएकोमा उनलाई क्याम्पसका तर्फबाट अभिनन्द गरिएको क्याम्पस प्रमुख बाबुराम तिम्सिनाले बताए ।

राष्ट्रपतिलाई दोसल्ला ओढाएर अभिनन्दन पत्र प्रदान गरिएको थियो । राष्ट्रपति भण्डारीले २०३९ साल देखि २०४१ सालसम्म उक्त क्याम्पसमा मानविकी संकाय अन्तरगत स्नातक तहको अध्यन गरेकी थिइन ।

अध्ययनका क्रममा उनी २०४० साल बैशाखमा सम्पन्न क्याम्पसको स्वतन्त्र विद्यार्थी यूनियनको निर्वाचनमा कोषाध्यक्ष पदमा निर्वाचित समेत भएकी थिइन् ।