इटहरी : विभागीय टोली नेपाल पुलिस क्लबले दोस्रो सभामुख कप पुरुष राष्ट्रिय भलिबल प्रतियोगिताको उपाधि उचालेको छ। पुलिसले सोमबार भएको फाइनलमा अर्को विभागीय टोली त्रिभुवन आर्मी क्लबलाई ३-१ को सेटमा हरायो। सुनसरी जिल्ला खेलकुद विकास समितिले आयोजना गरेको प्रतियोगिताको फाइनलमा पुलिसले आर्मीमाथि २६-२४, २२-२५, २५-२१, २५-१७ को जित निकालेको थियो। उपाधिसहित पुलिसले चार लाख रुपैयाँ पुरस्कार पायो। उपविजेता आर्मीले दुई लाख रुपैयाँमा चित्त बुझायो। एपीएफ क्लब तेस्रो भयो। एपीएफले गण्डकी प्रदेशलाई २५-२२, २५-१६, २६-२४ को सेटमा हरायो।
आर्मीका धनबहादुर भट्ट उत्कृष्ट खेलाडी घोषित भए। उनले २४ इन्चको एलईडी टीभी प्राप्त गरे। उत्कृष्ट स्पाइकर पुलिसका कुलबहादुर थापा, उत्कृष्ट ब्लकर पुलिसकै दीपक जोशी, उत्कृष्ट सेटर पुलिसकै यमबहादुर मगर घोषित भए। त्यस्तै उत्कृष्ट डिफेन्डर आर्मीका ईश्वर थापा र उत्कृष्ट क्विकर आर्मीकै भैरव बम घोषित भए। पुलिसका सरोज श्रेष्ठ उत्कृष्ट प्रशिक्षक भए। उनीहरू सबैले जनही पाँच हजार रुपैयाँ र ट्रफी पाए।
प्रतिक्रिया दिनुहोस !
