नेपालगन्ज : प्रदेश ५ सरकारले ५२ वटा स्मार्ट कृषि गाउँ बनाउने तयारी गरेको छ ।
प्रदेशमा रहेका १२ जिल्लाका हरेक निर्वाचन क्षेत्रमा एक–एक वटा कृषि स्मार्ट गाउँका रुपमा विकास गर्ने बताइएको हो । यस्ता गाउँका कृषि पूर्ण रुपमा आधुनिकीकरण गरिने प्रदेश ५ का कृषि, भूमि व्यवस्था तथा सहकारी मन्त्री आरती पौडेलले बताइन् ।
कृषि तथा आर्थिक विकासका विषयमा सञ्चारकर्मीको क्षमता अभिवृद्धि विषयक तीन दिने कार्यशाला गोष्ठी समापनको अवसरमा मन्त्री पौडेलले स्मार्ट गाउँबारे जानकारी दिएकी हुन् ।
मन्त्री पौडेलले भनिन्, ‘५२ वटा निर्वाचन क्षेत्रमा एउटा एउटा गाउँ छनोट गरेर कृषिको नमूना गाउँ बनााइने छ । त्यो स्मार्ट गाउँको कृषि पूरै यान्त्रिकरण हुनेछ । जहाँ विज्ञका ज्ञान र कृषि विषय अध्ययन गर्ने थलो बन्नेछ ।’
खेतीयोग्य जग्गा ठेक्कामा लिएर प्रदेशका भूमिहीनहरुलाई करार खेती गर्न सहयोग गर्ने नीति अवलम्वन गरिने पनि उनको भनाइ छ । ‘एकातिर जग्गा बाँझै छ । जग्गा हुने खेती गर्न नसक्नेहरुको जग्गा ठेक्कामा लिएर खेती गर्न चाहने भूमिहीन किसानलाई करार खेती गर्ने वातावरणका लागि वातावरण बनाइनेछ’, पौडेलले भनिन् ।
प्रदेश सरकारले किसानलाई कृषि उपजको मूल्य निर्धारण गर्दै बिक्री गरी सहकारीमार्फत १२ जिल्लामा एक–एक वटा सहकारी बजार बनाएको छ । बाँके जिल्ला गहुँ, आलु, तरकारी खेतीका लागि उपयुक्त मानिन्छ । बिगतमा यहाँबाट चामल बंगलादेश र श्रीलंकामा समेत निर्यात गरिएको बताइन्छ ।
प्रतिक्रिया दिनुहोस !
