सन्धिखर्क :
बाध्य भइयो परदेशमा छिर्न ।
मैले पढ्दा लाएको ऋण तिर्न ।
गायक बद्री पंगेनी मञ्चमा प्रवेश गरेर यो गीत गाएपछि मेला हेर्न आएका अधिकांश दर्शकका आँखा रसाए । कोही पिलपिलरुन पनि थाले । क्यामेरा भएका र मोबाइलले फोटा खिच्ने जतिले तस्बिर र भिडियोमा कैद गर्न थाले । जब बद्री भाबबिह्वल भएका आमाको नजिक गएर गीत गाउन थाल्छन् तब सबै दर्शक उनीतिर भावुक हुँदै झुम्मिन्थे ।
पंगेनीले आमाहरुलाई मात्र भावुक बनाएनन् । अन्य उमेरका दर्शकले पनि आँखा मनिल बनाए । जब जब बद्री विदेश छोरा भएका आमाहरु नजिकै गीत गाउन थाल्थे तब सबै दर्शकहरुका आँखामा आँसु छचल्किन्थ्यो ।
यो गीत गाइसकेपछि उनले भने, ‘सबै रुन पो थाल्नु भयो, आज त मेला हेर्न आउनु भएको हाँस्दै नाच्नु पर्छ ।’ उनले एउटा भजन गाएपछि सबै नाच्न थाले । उनले अब आमा दिदी बहिनीहरु सबैले विदेशमा होइन स्वदेशमै केही गरौँ भनेर सम्झाउन आग्रह गरे ।
पंगेनीले जब गीतमा ‘हाम्रो गाँउमा स्कुल छैन बाटो छैन पानी छैन, जनतालाई साँझ बिहान पेटभरी खान छैन’ गाए, तब सबै दर्शकले ताली बजाएर हात हल्लाउन थाले । सबैले ‘हो यही नै छ हाम्रो अवस्था’ भनेर संकेत गरे ।
सन्धिखर्कमा जारी अर्घाखाँची महोत्सवमा पंगेनीले ससुरालीमा, मन थिएन जोगी बन्नलाई, पञ्चेबजाको टाइकुटी टाइ लगायतका गीत गाएर भरपुर मनोरञ्जन दिए । उनको गीतमा युवायुवती, वृद्धवृद्धा सबै छमछमी नाच्दा सन्धिखर्कमा धुलो उडेको थियो । बद्रीको गीतमा साथ दिन र उनलाई हेर्न गाँउगाँउबाट मानिस आएका थिए ।
अर्घाखाँचीसहित छिमेकी गुल्मी, प्युठान, कपिलबस्तु, पाल्पा र कपिलबस्तुबाट सन्धिखर्क आएका दर्शकलाई गीत गाएर बद्रीले भरपुर मनोरञ्जन प्रदान गरेका छन् ।
अर्घाखाँचीका धार्मिक र पर्यटकीयस्थलको प्रचार प्रचार गरि संस्कृति जगेर्ना गर्ने उदेश्यले गरिएको महोत्सवमा कलाकारहरु प्रमोद खरेल, अमृता भट्टराई र शोभा त्रिपाठी लगायतले आफ्नो प्रस्तुती दिए ।
प्रतिक्रिया दिनुहोस !
