जहाज खरिद प्रक्रिया गलत थियो, म सुधारमा लागेको छु : मन्त्री अधिकारी
माघ ९, २०७५ बुधबार १६:१४:०
बिर्तामोड : संस्कृति, पर्यटन तथा नागरिक उड्डयन मन्त्री रविन्द्र अधिकारीले ‘वाइडबडी’ विमान खरिद गर्दा व्यापार योजना नै गलत भएकाले निगमलाई ठूलो आर्थिक क्षति पुगेको बताएका छन् ।
झापाको बिर्तामोडमा बुधबार पत्रकारसँग कुरा गर्दै मन्त्री अधिकारीले नेपाल वायुसेवा निगमका दुईवटा ‘वाइडबडी’ विमान खरिद प्रकरणमा आफ्नो संलग्नता नभएको दाबी गर्दै अघिल्लो सरकारकै पालामा खरिद प्रक्रिया गलत भएको बताएका हुन् ।
उनले ती वाइडबडी खरिद गर्दा रकम दिने, सम्झौता, खरिद मिति तोक्ने र गुणस्तर पहिचान गर्ने कुरामा तत्कालिन सरकारले गलत निर्णय गरेको आरोप लगाए ।
ती सबै प्रक्रिया आफूले मन्त्रालय सम्हाल्नु भन्दा अघि नै सकेकाले यस प्रकरणमा आफ्नो संलग्नता नरहेको अधिकारीले स्पष्टिकरण दिए । मन्त्री अधिकारीले भने, ‘विमान किन्ने प्रक्रिया २०७१ सालबाट सुरु भएको हो, नेपाललाई जहाज चहिन्थ्यो, बिज्नेस प्लान राम्रो भयो–भएन अझै अनुसन्धान आवस्यक छ ।’
ती विषयमा अनियमितता भएको वा नभएकोबारे पनि अनुसन्धान भइरहेकोले गलत भेटिए सबैलाई कारबाही हुने उनले बताए । साथै यसअघि नेपालले जहाज खरिद गर्न पैसा पठाउने र उतै ढिसमिस हुने परिपाटीले निगमलाई क्षति पुगेको दाबी उनको छ ।
‘पहिलेका धेरै खरिद प्रक्रिया गलत भेटिएका छन्, म सुधारमा लागेको छु, केहीले धमिल्याउन पनि खोजे,’ अधिकारीले भने । आफूले मन्त्रालय सम्हालेपछि वायुसेवा निगममा ठूलो सुधार ल्याएको पनि अधिकारीको दावी छ ।
प्रतिक्रिया दिनुहोस !
