ओखलढुंगाः शनिबार दिउँसो १ बजे सोलुदुधकुण्ड नगरपालिका -१० पत्तालेको हिमालयन होटलमा खाजा अभाव भइसकेको थियो। हिउँ खेल्न ओखलढुंगाबाट पुगेका आन्तरिक पर्यटक अर्गानिक आलु र तोङ्वा अर्डर गर्दै थिए।
मोलुङ गाउँपालिका- ४ का काशी घिमिरेले खाजा सोध्दा सकिएकाले फेरि बनाउनुपर्ने होटलका कर्मचारीले बताए। हिँउ परेको समयमा पत्तालेका होटल खचाखच भरिएका छन्। तीन दिनदेखि लगातार हिमपात भएपछि ओखलढुंगा र सोलुखुम्बुको सिमाना पर्ने पत्तालेमा आन्तरिक पर्यटकको घुँइचो लागेको छ। सोलु र ओखलढुंगाको सिमानामा रहेको पत्ताले यस क्षेत्रकै चर्चामा रहेका पर्यटकीय क्षेत्र हो।
यहाँबाट विश्वको सर्वोच्च शिखर सगरमाथासहित महालङ्गुर हिमश्रृङ्खलामा पर्ने सबै हिमाल देख्न सकिन्छ। यहाँबाट माछापुछ्रे समेत हेर्न सकिने स्थानीय रवि मगरले बताए। उनका अनुसार सिजनमा होटलहरुमा बास बस्न समेत ठाउँ अभाव हुने गरेको छ।
यहाँ श्याउको जुस, तामा र बुङको आलु चर्चित परिकार हुन्। अर्गानिक परिकारको स्वाद र हिमश्रृङ्खलाको दृश्यावलोकन गर्न घुमफिर गर्ने तीन जिल्लाको संगम स्थललाई आधुनिक पर्यटकीय स्थलका रुपमा विकास गर्न सरोकारवालाले जोड दिएका छन्।
प्रतिक्रिया दिनुहोस !
