भेनेजुएलालाई शान्तिपूर्ण तरिकाले संकट समाधान गर्न नेपाल सरकारको आग्रह
माघ १५, २०७५ मंगलबार १९:९:०
काठमाडौं : भेनेजुएलामा उत्पन्न भएको राजनीतिक संकटबारे नेपाल सरकारले पनि चासो देखाएको छ । आज परराष्ट्र मन्त्रालयले प्रेस विज्ञप्ति निकाल्दै भेनेजुएलाको संकट शान्तिपूर्ण तरिकाले समाधान गर्न आग्रह गरेको छ ।
नेपाल शान्ति, स्थायित्व र एकताको पक्षमा रहेकाले शान्तिपूर्ण तरिकाले समाधान निकाल्न विज्ञप्तिमार्फत आग्रह गरिएको छ । साथै भेनेजुएलाको राजनीतिक र संवैधानिक चरणबारे निर्णय गर्ने अन्तिम अधिकार त्यहीँका जनतामा रहेको नेपाल सरकारले जोड दिएको छ ।
‘बोलिभारियन गणतन्त्र भेनेजुएलाको पछिल्लो राजनीतिक विकासलाई हामीले नजिकबाट नियालिरहेका छौँ,’ विज्ञप्तिमा भनिएको छ, ‘आन्तरिक राजनीतिक समस्यालाई संवैधानिक र लोकतान्त्रिक पद्धत्तिबाटै आन्तरिक रुपमै हल गर्नुपर्छ भन्ने नेपालको विश्वास छ ।’
भेनेजुएलामा पछिल्लाे केही महिनायता त्यहाँका राष्ट्रपति निकाेलस मादुराेकाे राजीनामा माग्दै लाखाैं जनता सडकमा उत्रिएका छन् । विपक्षी युवा नेतालाई नयाँ राष्ट्रपति घाेषणा गरिएकाे छ । अमेरिका, बेलायत लगायतका मुलुकले मादुराेकाे विपक्षमा विज्ञप्ति जारी गरेका छन् भने चीन, रुस लगायत मुलुकले मादुराे पक्षमा । यहाँ उत्पन्न राजनीतिक संकटमा विश्वले चासाे देखाइरहेकाे छ ।
प्रतिक्रिया दिनुहोस !
