पुल नहुँदा खाेलाले ८ जनालाई बगाइसक्याे
प्युठान : ढाँडस्थित झिमरुक खोलामा पक्की पुल नबन्दा बर्सेनि सर्वसाधारणले ज्यान गुमाउनुपरेको छ । खोलाले बगाएर हालसम्म आठ जनाको मृत्यु भइसकेको स्थानीयले बताएका छन् । प्रहरी जवान विष्णुबहादुर महतराको अघिल्लो वर्ष कार्यस्थल रोल्पा फर्कंदै गर्दा बगाएर मृत्यु भएको छ ।
झिमरुक गाउँपालिका–८ लिवाङ टिमुरचौरकी निर्मला गिरी, दारीमचौरका रेकम खत्री, सोही ठाउँका भक्तबहादुर खत्री, तुषारा गोब्दीका मोहनसिंह बस्नेत, ओखरकोटका मीनबहादुर जिसी, ओखरकोट ढाँडका अनिल खड्का र एक जना पहिचान नखुलेका लिवाङका युवाको खोलाले बगाएर ज्यान गएको छ । झिमरुक नदी यस क्षेत्रका स्थानीयका लागि त्रासको मार्ग बनिरहेको छ ढाडका स्थानीय पदम खड्काले बताए । उनले भने, ‘पढ्दै गरेको छोरालाई खोलाले बगाएर मृत्यु भयो, पुल बनाउन कसैले चासो देखाएनन् ।’
पुल नबन्दा झिमरुक, गौमुखी र नौबहिनी गाउँपालिकामा पर्ने दर्जनभन्दा बढी दुर्गमका नागरिक प्रत्यक्ष प्रभावित भएका छन् । लिवाङ, तुषारा, लुङ, पुँजा, खुङ, नारीकोट, रजवारा, अर्खा, बांगेमरोट, खवाङ, स्याउलीवाङ र ओखरकोटसहित सिमाना जोडिएका छिमेकी जिल्ला गुल्मी, अर्घाखाँची र बाग्लुङका नागरिक जोखिम मोलेर खोला वारपार गर्दै आएका छन् ।
बर्खाभरि खोला बढेपछि सर्वसाधारण स्थानीय छिपछिपे सामुदायिक वनको अप्ठ्यारो बाटो हुँदै बजार गर्न जाने गर्छन् । भीरको बाटोसमेत अवरुद्ध हुने गर्छ । खोलापारिका नागरिक ढाँड, मच्छी बजार गर्न घण्टौं लगाएर आउनुपर्ने बाध्यता छ । गाउँपालिका कार्यालय मच्छीमा पुग्नसमेत स्थानीयलाई सास्ती हुने गरेको छ । बाल शिक्षा मावि, गौमुखी क्याम्पस, नेसनल÷गौमुखी इंग्लिस बोर्डिङ स्कुलका सयौँ विद्यार्थी प्रत्यक्ष प्रभावित भएका छन् ।
स्थानीय पूर्वाधार विकास तथा कृषि सडक विभाग (डोलिडार) अन्तर्गत साविक जिल्ला प्राविधिक कार्यालय प्युठानले पुल निर्माण थालनी ग¥यो । तर, निर्माण स्थलमा दलदलसहितको माटो भेटिएपछि काम प्रभावित बन्यो । प्राविधिक समस्या देखिएपछि निर्माण रोकिएको निर्माण व्यवसायी बालाजु श्रेष्ठले बताए । ‘निर्माण कम्पनीबाट पुनः डिजाइन स्टिमेट बनाएर पेश गर्ने योजनामा छौँ’, उनले भने, ‘कार्यालयले स्वीकृत गर्छ÷गर्दैन, त्यसपछि मात्र काम अघि बढ्छ ।’ नीलगिरी÷आँसु जेभी निर्माण सेवाले भ्याटसहित चार करोड दुई लाख रुपैयाँ लागतमा पक्की पुल निर्माणको जिम्मा पाएको थियो । निर्माण कम्पनीले ३० प्रतिशत भुक्तानी लिइसकेको छ । निर्माणस्थलमा वारिपारि दुईवटा पिलर उठाइएको छ । ‘बीचको पिलर उठाउन बाँकी थियो’, श्रेष्ठ भन्छन्, ‘दलदल सहितको माटो भेटिएपछि काम रोकेका हांै ।’ यस स्थानमा साविक प्राविधिक कार्यालयले पटक–पटक माटो परीक्षणसमेत गरेको थियो । स्थानीयले पहिलेकै स्थानमा पुनः पुल बन्न नसके अन्यत्र सर्भे गरी निर्माण थाल्न माग गरेका छन् ।