एक ट्र्याक्टर भुइँकटहरका बिरुवा बरामद
बिर्तामोड : गुणस्तर चेकजाँच बिना भारतबाट नेपाल भित्राइएको एक ट्याक्टर भुइँकटहरको बिरुवा प्रहरीले नियन्त्रणमा लिएको छ ।
क्वारेन्टाइन तथा भन्सार प्रक्रिया बिना अवैध बाटो भएर नेपाल भित्राइएको एक ट्याक्टर भुइँकटहरको बिरुवा वडा प्रहरी कार्यालय भद्रपुरले बरामद गरेको प्रहरी निरीक्षक यमकुमार श्रेष्ठले बताए ।
प्रहरीले भद्रपुर–५ स्थित देवीबस्ती नाकाबाट बिरुवा भएको मे १ त ६५४९ नम्बरको ट्याक्टर नियन्त्रणमा लिएको हो । नियन्त्रणमा लिएको ट्याक्टरसहित बिरुवालाई आवश्यक कारवाहीका लागि भद्रपुर भन्सार बुझाइसकेको प्रहरी निरीक्षक श्रेष्ठले जानकारी दिए ।
भद्रपुर भन्सार कार्यालयका प्रमुख भन्सार अधिकृत फणिन्द्र खतिवडाका अनुसार बोटविरुवामा ५ प्रतिशत भन्सार सुधार शुल्क लाग्छ । बोटविरुवाको भन्सार प्रक्रिया गर्नुअघि प्लान्ट क्वारेन्टाइनले चेकजाँच गरेको पत्र चाहिन्छ ।
भन्सारले ट्याक्टर भने छाडिदिएको तर करिब १ हजार बिरुवा भन्सारभित्रै रहेको जनाएको छ । पछिल्लो समय प्लान्ट क्वारेन्टाइन चेकजाँच बिना भारतीय बोटबिरुवा भित्रन थालेपछि प्रहरीले निगरानी बढाएको हो ।