बागलुङ : जिल्लाको दुर्गम निसीखोलास्थित एक दलित परिवारले किरिया खर्च समेत जुटाउन नसक्दा १३ दिने संस्कार नै छोट्याउनु परेको छ ।
निसीखोला गाउँपालिका–७ राजकुट मुदुङका ४५ वर्षीय लक्ष्मण विकको धौलागिरी अञ्चल अस्पताल बागलुङमा उपचारका क्रममा शनिबार निधन भएको थियो ।
सदरमुकामदेखि धेरै टाढाबाट उपचारको क्रममा अस्पतालमा श्रीमती सहित आएका विकको मृत्युपछि उनको शव अन्यष्टिमा समेत आर्थिक अभाव भए पछि आर्थिक सहयोग जुटाएर अन्त्यष्टि गरिएको थियो ।
ऋण जुटाएर उपचार गर्न १४ फागुनमा अस्पताल आएका विक परिवारसँग भएको रकम उपचारमै सकिएपछि शव अन्येष्टि गरेर घर फर्कनै समस्या थियो । मृतकका दाजु बलबहादुर विक भन्छन्, ‘भाइलाई अल्पायुमै गुमाउँदाको पीडा एकातिर छ, अर्कोतर्फ शव गाउँको आफ्नै घाटमा लैजाने मन हुँदाहुँदै लैजान सकिएन । धेरथोर सहयोगबाट नजिकैको कालीगण्डकीमा लगेर अन्त्यष्टि गर्न बाध्य भइयो ।’
बलबहादुरका अनुसार अब अन्यष्टि गरेर घर फर्कन र संस्कार अनुसार काजकिरिया उम्काउन परिवारलाई थप समस्या छ । परम्परा अनुसार, काजकिरिया पूरै उम्काउन सामान्यतः ४० देखि ५० हजार खर्च हुन्छ । १३ दिन काजकिरिया गर्ने संस्कारलाई विक परिवारले भने छोट्याएर तीन दिनमै सक्ने तयारी गरेका छन् ।
भाइको मृत्युको खबर पाएलगतै गाडी भाडा समेत ऋण खोजेर बागलुङ बजार आएका बलबहादुरले सबैसँग सहयोगको अपिल गरेका छन् । एक श्रीमती र चार वर्षका दुई जुम्ल्याहा छोरा–छोरी रहेका विक गत माघदेखि थला परेका थिए । ज्याला मजदुरीमा जीवन निर्वाह गर्दैआएको विक परिवारको घरमुलीको निधन भएपछि परिवारको अबको लालनपालन, शिक्षा दिक्षामा समेत समस्या हुने देखिएको छ ।
बागलुङका युवा सज्जनकुमार सिंहले भने स्थानीय संघ संस्था र व्यक्तिसँग सहयोगको अपिल गरेर काजकिरिया, छोराछोरीको शिक्षाको लागि सहयोग अभियान चलाउने बताएका छन् ।
प्रतिक्रिया दिनुहोस !
