प्रधानमन्त्रीले विप्लवलाई भने : कम्युनिष्टको नाममा आतंक बन्द गर

बिर्तामोड : प्रधानमन्त्री केपी शर्मा ओलीले नेत्रविक्रम चन्द ‘विप्लव’ नेतृत्वको नेकपालाई कम्युनिष्ट पार्टीको नाममा आतंक मच्चाउने काम तत्काल बन्द गर्न आग्रह गरेका छन् । 

झापाको खुदुनाबारी र इलामको दानावारी नजिकैको जंगलस्थित रहेको सुखानी पार्कमा मंगलबार आयोजित ४६ औँ सुखानी सहिद स्मृति दिवस तथा श्रद्धाञ्जलीसभालाई सम्बोधन गर्दै प्रधानमन्त्री ओलीले यस्तो बताएका हुन् ।

उनले अब जनता मार्ने, लुट मचाउने, चन्दा असुल्ने र विस्फोट गराउने कम्युनिष्ट पार्टी नेपालमा नरहेकाले आफूहरु कम्यूनिष्ट भए यस्तो काम बन्द गर्न निर्देशन दिए । 

उनले अहिले नेपालमा सबै कम्युनिष्ट पार्टी एक ढिक्का भइसकेको बताउँदै कोही सच्चा कम्युनिष्ट छुटेको भए ढोका खुल्ला रहेको बताए । सहिदहरुको बलिदान र मूल्याङ्कन गर्न कम्युनिष्ट पार्टी नीति बनाएर अघि बढिसकेको बताउँदै नेकपा अध्यक्षसमेत रहेका प्रधानमन्त्री ओलीले अब नेपालमा दमन र लुटपाटले राजनितिक परिवर्तन नहुने दाबी गरे । 

वर्तमान सरकार सहिदको सपना पूरा गराउन जनताको हितमै काम गरिरहेको उल्लेख गर्दै उनले सरकारले काम गरेन भन्नुको अर्थ नरहेको जिकिर गरे । केही शक्ति र प्रतिक्रियाबादी समूहले भर्खरै एकता भएको पार्टी फुटाउन लागि परेकोले नेकपामा कुनै असन्तुष्टि नरहेको उनले प्रस्टाए ।

मंगलबारको ४६ औँ सुखानी सहिद स्मृति दिवसलाई श्रद्धाञ्जली विषेश बनाइएको थियो । केहि दिनअघि ताप्लेजुङमा भएको हेलिकप्टर दुर्घटनामा निधन भएका पर्यटनमन्त्री रवीन्द्र अधिकारी र शनिबार राति निधन भएका नेता भरतमोहन अधिकारीको संयुक्त श्रद्धाञ्जली सभा पनि सुखानीमा गरिएको थियो ।