झापा गोल्डकप :  रुपन्देहीलाई हराउँदै क्यामरुनी दाउफिन्स सेमीमा

बिर्तामोड : तीनवटा प्रतिष्ठित गोल्डकपको उपाधि जितेको क्यामरुनी दाउफिन्स फुटबल क्लब झापा गोल्डकपको सेमीफाइनलमा प्रवेश गरेको छ । बिहीबारको खेलसँगै झापा गोल्डकपमा पहिलो चरणका खेलहरु पनि सकिएका छन् । 

लाली रुपन्देही ११ सँग भएको प्रतिष्पर्धामा जित निकालेको दाउफिन्सले सेमीफाइनलमा त्रिभुवन आर्मी क्लबसँग प्रतिष्पर्धा गर्ने छ । आर्मीले यसअघि सशस्त्र प्रहरीको एपीएफ क्लबलाई पराजित गर्दै सेमीफाइनलमा स्थान सुरक्षित गरिसकेको छ । 

पोखरामा भएको आहा रारा गोल्डकपको सेमीफाइनलमा आर्मीले दाउफिन्सलाई १−० गोल अन्तरले पराजित गरेको थियो । 

दाउफिन्सले खेलको ३८ औं मिनेटमा अग्रता लिएको थियो । रुपन्देहीका पेपी अडामाले दाउफिन्सका मिसोउली इटिग्नेलाई डि बक्सभित्र फाउल गरेपछि दाउफिन्सले पेनाल्टी पाएको थियो । पेनाल्टीमा दाउफिन्सका पेट्न्गाले गोल गरेका थिए । 

खेलका् ८७ औं मिनेटमा मैदानको मध्यभागबाट मिसोउली इटिग्नेले गरेको प्रहारले जाली चुमेसँगै दाउफिन्सले अग्रता दोब्बर बनायो । रुपन्देहीका गोलरक्षक अगाडि बढेको समयमा मैदानको मध्यभागबाट इटिग्नेले पोष्टमा प्रहार गरेका थिए । 

खेलको अधिकांस समय रुपन्देहीले बललाई आफ्नो पकडमा राख्न सफल भए पनि पोष्टमा गरेको प्रहार फितलो हुँदा गोल गर्ने अवसरबाट बञ्चित भयो । 

खेलको २३ औं मिनेटमा रुपन्देहीका लागि बिदेशी खेलाडी मन्सा विअभोगीले डि एरियामा मिलाई दिएको पासलाई निरबहादुर बलले कडा प्रहार गरे पनि दाउफिन्सका गोलरक्षक प्रिसो जाङगाले उत्कृष्ठ बचाउ गरेका थिए । 

३२ औं मिनेटमा दाउफिन्सका टिना टिनाले खाली पोष्टमा गोल गर्न सकेनन् । ७७ औं मिनेटमा टिना टिनाले वान भर्सेस वान गोल गर्न सकेनन । खेलको म्यान अफ द म्याच बिजेता टीम दाउफिन्सका मिसोउली इटिग्ने घोषित भए । उनले नगद १५ हजार रुपैंयाँ पुरस्कार पाए । 

दाउफिन्सले यो सिजनमा तिलोतमा, मनकामना र बुढासुब्बा गोल्डकपको उपाधि हात पारिसकेको छ । शुक्रबारको पहिलो सेमीफाइनल खेल झापा ११ र रुस्लान थ्रि स्टार क्लबबीच हुने आयोजक समितिका संयोजक महेन्द्र गिरीले जानकारी दिए ।

खेलपछि भएको पोष्ट म्याच कन्फ्रेन्समा बोल्दै बिजेता टीम दाउफिन्सका मेनेजर आशिक थापा मगरले टीमले सन्तोष जनक नतिजा दिएको बताए । उनले दाउफिनसले रफ खेल्छ भन्ने आरोपको खण्डनका लागि पनि खेलाडीलाई सचेत गराएकाले राम्रो खेल प्रस्तुत गरेको बताए । 

पराजित रुपन्देहीका प्रशिक्षक दयाराम सापकोटाले शुरुमा स्कोर गर्न पाएको अवसर सदुपयोग हुन नसकेपछि दवावमा खेल्नु परेको हुनाले परिणम आफ्नो पक्षमा नपरेको बताए । उनले शारीरिकरुपमा बलिया खेलाडीसँग आफ्ना खेलाडीले सन्तोषजनक प्रदर्शन गरेको बताए ।