डोल्पा : त्रिपुरासुन्दरी नगरपालिका खातिज्युलास्थित जडीबुटी प्रशोधन उद्योग पुनः सञ्चालनमा आएको छ । पुस दोस्रो सातादेखि पिरे घाँस प्रशोधन गरी १ सय ४० लिटर तेल उत्पादन गरिएको प्रबन्धक प्रकाश बूढाको भनाइ छ ।
भुल्ते, बोझो, पिरे घाँसलगायत जडीबुटी स्थानीयस्तरमै प्रशोधन गर्न ०६३ मा १६ लाख लागतमा उद्योग स्थापना गरिएको थियो । यो उद्योग आर्थिक अभावमा बन्द थियो । प्रदेश सरकारले ५० लाख बजेट उपलब्ध गराएपछि मर्मत गरी सञ्चालन गरिएको हो । वनमा खेर गइरहेको पिरे घाँस प्रयोगमा आउने भएपछि स्थानीय खुसी भएका छन् ।
यो घाँस प्रतिकिलो १० रुपैयाँमा उद्योगले खरिद गरी तेल निकाल्ने गरेको छ । ‘तेल निकाल्ने उद्योग बन्द भएपछि पिरे घाँस खेर गइरहेको थियो’, स्थानीय चन्द्ररुपा सार्कीले भनिन्, ‘सानो भए पनि यो उद्योग हामीलाई रकम आर्जन गर्ने माध्यम बनेको छ ।’ उद्योगले घाँस खरिद गर्न थालेपछि स्थानीयलाई आर्थिक उपार्जनको बाटो बनेको उनको भनाइ छ ।
अर्को वर्षदेखि भुल्ते र बोझो प्रशोधन गरी तेल निकालिने बुढाले बताए । पिरे घाँसको तेल भारत, अस्ट्रेलिया, पाकिस्तान र चीनलगायत देशमा प्रतिलिटर ७ हजारदेखि १२ हजार रुपैयाँसम्म पर्ने जनाइएको छ ।
दोस्रो नगरसभाले उद्योग सञ्चालनमा ल्याई बेरोजगार युवालाई रोजगारी दिने घोषणा गरेको थियो । ३० स्थानीय युवाले उद्योगमा रोजगारी पाएका छन् ।
प्रतिक्रिया दिनुहोस !
