भाइबहिनी हो, तिमीहरूले ‘गिनिज वल्र्ड रेकर्डस्’का बारेमा कतै सुनेको वा पढेको पक्कै हुनुपर्छ । प्रत्येक वर्ष प्रकाशित हुने एउटा सन्दर्भ पुस्तक हो ‘गिनिज वल्र्ड रेकर्डस्’ । यसमा विश्व कीर्तिमानीको नाम संकलन हुने गर्छ । सन् २००० सम्म यसको नाम ‘गिनिज बुक अफ रेकर्डस्’ थियो । यो पुस्तक सर्वाधिक बिक्री भएको कपीराइट पुस्तकका रूपमा स्वयं एक कीर्तिमानधारी पुस्तक पनि हो ।
संसारसामु आफ्नो नाम चिनाउने एउटा उपयुक्त माध्यम हो, ‘गिनिज वल्र्ड रेकर्डस्’ । यसमा नाम लेखाउन अरूभन्दा भिन्न हुनु अनिवार्य सर्त हो । फरक काम गरेर ‘गिनिज वल्र्ड रेकर्डस्’मा नाम लेखाउन सफल व्यक्ति हुन्, सौगात विष्ट ।
सानै उमेरमा फिल्म निर्देशन गरेका नेपालका सौगात विष्ट विश्वकै कान्छा निर्देशक बने । सात वर्ष तीन सय ४० दिनको उमेरमा उनले व्यावसायिक रूपमा फिचर फिल्म ‘लभ यु बाबा’ निर्देशन गरे । यसलाई ध्यानमा राख्दै ‘गिनिज वल्र्ड रेकर्डस्’ले उनलाई विश्वकै कान्छा फिल्म निर्देशकको मान्यता दियो । साथै, ‘योंगेस्ट फिल्म डाइरेक्टर’को उपाधि पनि दियो ।
६ जनवरी २००७ मा जन्मेका सौगातले निर्देशन गरेको फिल्म १२ डिसेम्बर २०१४ मा ८० वटा हलमा एकैसाथ रिलिज भएको थियो । ‘गिनिज वल्र्ड रेकर्डस्’मा भारतीय कान्छा निर्देशक किसन श्रीकान्तले सन् २००६ मा ‘फुटपाथ’ फिल्म निर्देशन गरेर बनाएको विश्व कीर्तिमान सौगातले भंग गरेका हुन् ।
सौगातले निर्देशन गरेको फिल्ममा उनका बाबा गजित विष्ट, निश्मा घिमिरे, अशिष्मा नकर्मी, वसन्त भट्ट, निर्मल शर्मा लगायतले अभिनय गरेका थिए । फिल्मको कथा, पटकथा उनकै बाबा गजितले लेखेका थिए ।
यति मात्रले सौगातको अभियान रोकिएन । उनले व्यावसायिक रूपमा दोस्रो फिचर फिल्म ‘हैरान’समेत निर्देशन गरिसकेका छन् । यो फिल्म गत जेठ ४ मा रिलिज भएको थियो । यो फिल्ममा सामाजिक विषयवस्तु समेटिएको छ । सत्यराज आचार्य, गजित विष्ट, मोहमद वसिम राजा, सागर लम्साल, निश्मा घिमिरे, सरोज खनाल, बुद्धि तामाङ, पुष्कर रेग्मी, एन्जल राई, आरोही शर्मा लगायतको अभिनय छ फिल्ममा ।
सबैसँग धेरै मिल्ने स्वभाव सौगातको छ । साथीहरूसँग निकै घुलमिल हुन्छन् उनी । सबैसँग मिलेर खाजा खान्छन् । गिनिजमा रेकर्ड राखेपछि साथीहरूले उनलाई फरक रूपले हेर्ने गरेको उनको अनुभव छ ।
सौगात हाल शान्तिनगरस्थित बेबिलोन नेसनल स्कुलमा ६ कक्षामा अध्ययन गर्दै छन् । काठमाडौंको घट्टेकुलोमा बस्दै आएका उनी आफ्नो बाबा गजित विष्टले मैतीदेवीमा सञ्चालन गर्दै आएको डान्स स्कुलमा नृत्यसमेत सिक्दै छन् ।
सौगातका बाबा गजित फिल्म क्षेत्रमा लामो समयदेखि क्रियाशील छन् । त्यसैले उनलाई फिल्मी क्षेत्रको बाटो सहज भएको हो । भिडियो विज्ञापनबाट उनी अभिनयमा प्रवेश गरे । त्यसपछि उनले ‘कखरा’ नामको डकुमेन्ट्रीमा अभिनय गर्ने अवसर पाए । यसको प्रदर्शनपछि उनलाई धेरै अफर आउन थाल्यो ।
‘जन्मभूमि’ फिल्मबाट फिल्मबारे धेरै अनुभव सँगालेका उनी भन्छन्, ‘मेरो दिमागमा फिल्म गर्ने आइडिया आयो । मेरो आइडिया बाबालाई सेयर गरेँ । उहाँले ओके भन्नुभयो ।’ फिल्मका बारेमा जानकारी लिन युट्युब पनि माध्यम बनेको उनको भनाइ छ । सौगात भन्छन्, ‘बाबा र परिवारकै अन्य सदस्यका कारण म आज यो ठाउँमा छु । देशको नाम चिनाउन सफल भएको छु । यसमा मलाई गर्व लाग्छ ।’
सुरुमा सौगातलाई फिल्मको दृश्य आफू अनुकूलकै चाहिन्थ्यो । एडिटिङ गरेर मिलाउन मिल्छ भन्ने उनलाई थाहा थिएन । डबिङ, एडिटिङ गर्दा यसबारे जानकार हुँदै गए । पहिलोभन्दा दोस्रो फिल्मा धेरै सुधार गरेको उनी बताउँछन् ।
एक पार्टीमा जाँदै गर्दा ‘गिनिज वल्र्ड रेकर्डस्’बाट एप्रुभ भएको म्यासेज सौगातको बाबाको मोबाइलमा आएको रहेछ । त्यसपछि उनको परिवारमा खुसियाली छायो । सौगात भन्छन्, ‘मैले गरेको कामको सफलता सानैमा पाएँ ।’
अर्को प्रसंगमा उनको भनाइ छ, ‘आफ्ना सन्तानमा भएको क्षमता बाबा आमालाई मात्र थाहा हुन्छ । मेरो क्षमताका बारेमा दुवैले समयमै थाहा पाउनुभयो । अनि फिल्म बनाउन सपोर्ट गर्नुभयो ।’
सौगातले फिल्म र सम्मानको सिलसिलामा देशविदेशका धेरै ठाउँ पुग्ने अवसर पाएका छन् । उनी जापान, कतार, चीन, भारत, सिंगापुर, यूएई पुगिसकेका छन् । त्यस्तै नेपालका धेरै सहर पुगेका उनलाई पोखरा सबैभन्दा राम्रो लाग्छ ।
‘हरेक बालबालिकाले धेरै पढ्नुपर्छ भनेर बाबुआमाले सोचेका हुन्छन्’, सौगातका बाबा गजित भन्छन्, ‘पढाइका साथसाथै खेल्न पनि दिनुपर्छ । खेलले पनि उनीहरूको क्रिएसन बढ्छ ।’
गजितका अनुसार सौगात सानोमा निकै राम्रो नाच्थे । उनी आफैं कोरियोग्राफर भएको हुँदा आफ्नो बिँडो थाम्ने भयो भन्ने लाग्थ्यो । कलाकार बन्छ कि जस्तो लाग्न थाल्यो । गजित भन्छन्, ‘पछि अचानक निर्देशनमा चासो देखायो । हामीलाई पनि अनौठो लाग्यो ।’
सबैसँग धेरै मिल्ने स्वभाव सौगातको छ । साथीहरूसँग निकै घुलमिल हुन्छन् उनी । सबैसँग मिलेर खाजा खान्छन् । गिनिजमा रेकर्ड राखेपछि साथीहरूले उनलाई फरक रूपले हेर्ने गरेको उनको अनुभव छ ।
उनले शिक्षकहरूबाट पनि धेरै सपोर्ट पाएका छन् । ‘मैले सम्मान पाउँदा उहाँहरू पनि खुसी हुनुहुन्छ । कामको सिलसिलामा बाहिर जाँदा पनि स्कुलको राम्रो सपोर्ट पाएको छु’, उनी भन्छन् ।
सौगात अब आफू पढाइमा फोकस हुने बताउँछन् । उनी भन्छन्, ‘एसईईसम्मको पढाइ भनेको जग हो । यसलाई बेलैमा बलियो बनाउनु पर्छ । त्यसैले पढाइमै फोकस हुन्छ मेरो ।’
प्रतिक्रिया दिनुहोस !
