काठमाडौं : फिल्म ‘लभ स्टेसन’को नयाँ गीत ‘मेरो आँगनीमा आज जून उदायो’को भिडियो सोमबार रिलिज गरिएको छ। बूढासुब्बा मुभिज युट्युब च्यानलबाट सोमबार साँझ यो गीतको भिडियो रिलिज गरिएको हो।
‘लिली बिली’का लोकप्रिय जोडी अभिनेता प्रदीप खड्का र अभिनेत्री जसिता गुरुङ अभिनीत ‘लभ स्टेसन’को यो गीतमा यिनै दुई जोडीको सम्बन्ध देखाइएको छ।
अभिनेता प्रदीपका अनुसार उनी यो चलचित्रमा एउटा लोक ब्यान्डका भोकलिस्ट (गायक) हुन्छन्। यो गीतबारे उनले भने, ‘लभ स्टेसन क्याफेमा म आफ्नो ब्यान्डसहित गायनको तयारीमा हुन्छु। सोही क्याफेमा जसिताको आगमनपछि मैले उनको प्रशंसामा यो गीत गाउँछु।’
संगीतकार शम्भुजित बास्कोटाको संगीत रहेको यो गीतमा युवा गायक सुरेश लामाको स्वर छ। गीत लभ स्टेसनका निर्देशक उज्ज्वल घिमिरेले लेखेका हुन्। चलचित्रमा यो गीतमार्फत अभिनेता प्रदीपलाई गायकका रूपमा स्थापित गराइएको प्रस्तुतकर्ता गोविन्द शाहीले जानकारी गराए। चलचित्रको रिलिज मिति नजिकिँदै गर्दा आफूहरू प्रचारप्रसारमा व्यस्त रहेको प्रस्तुतकर्ता शाहीले जानकारी गराए। उनका अनुसार लभ स्टेसन टिमले मंगलबारदेखि मोफसलको यात्रा पोखराबाट सुरु गर्दै छ।
यो चलचित्रमा प्रदीप र जसितासँगै रमेश बुढाथोकी, प्रकाश शाह, रेशु भट्टराई, विनोदकुमार पौड्याल, प्रिया रिजाल, सरु विष्ट, रवि डंगोल, दिनेश काफ्ले, कालु राना सहितको अभिनय छ। लभ स्टेसनलाई काफिया फिल्मस्को ब्यानरमा काफिया शाही (क्रिसु) र कविरविक्रम शाहीले निर्माण गरेका हुन्।
आलोक शुक्लाको छायांकन रहेको लभ स्टेसनमा शम्भुजित बाँस्कोटा, दीपक शर्मा, राजनराज शिवाकोटी र एलिस कार्कीको संगीत छ। त्यसमा अर्जुन जीसी र लोकेश वज्राचार्यको सम्पादन, शिशिर खातीको कोरियोग्राफी छ।
प्रतिक्रिया दिनुहोस !
