बिर्तामोड : झापाको मेचीनगर–१० स्थित आम्दा मेची अस्पतालमा उपचारको क्रममा एक बालकको मृत्यु भएपछि आफन्त र परिवारजनले चिकित्सकको लापरवाही भन्दै आन्दोलन गरेका छन् ।
मेचीनगर–९ का १० वर्षीय गोपाल रिजाललाई अचानक बान्ता आएपछि उपचारका लागि सो अस्पताल लगिएको थियो । बान्ता मात्रै गरेको बालकलाई सुई लगाएर बेहोस बनाएर उपचार गर्न खोज्दा मृत्यु भएको बताइएको छ ।
मृतकका बावु नकुल रिजालले बान्ता मात्रै गरेको बालकलाई डाक्टरले आवस्यकता भन्दा धेरै सुइ लगाएको आरोप लगाएका छन् । उपचारमा लापरवाही गरेका कारण उनको मृत्यु भएको बावु नकुल र आफन्तको आरोप छ ।
‘बच्चाको अवस्था गम्भिर बनाएर रेफर भन्दा अस्पताल बाट निकालेर घर पु¥याउँदा मृत्यु भयो, अर्को अस्पताल समेत पु¥याउन पाएनौँ,’ रिजालले बताए ।
आइतबार बिहानै अस्पताल भर्ना गरिएका गोपालको दिउसोसम्म स्वास्थ्यमा सुधार आए पनि राति करिब २ बजेतिर अचानक स्वास्थ्य अवस्था जटिल बनेपछि डाक्टरलाई खबर गर्दा चिसोको कारण भन्दै पंखा बन्द गर्न आग्रह गरेका थिए ।
डाक्टर पोषणरमण त्रिपाठी, युवराज रोय र दिपक साह बालकको उपचारमा संलग्न थिए । उपचारमा संलग्न डाक्टर त्रिपाठीले आफू उपचारमा संंलग्न रहुञ्जेलसम्म बालकको अवस्था सामान्य रहेको प्रतिक्रिया दिएका छन् । पोष्टमार्टम रिपोर्ट नआएसम्म घटनाबारे केही भन्ने अवस्था नरहेको उनको भनाइ छ ।
गोपालको मृत्यु भएपछि परिवार तथा स्थानीयले सोमबार दिउसो अस्पताल घेराउ गरेका थिए । चिकित्सकको असावधानीले बालकको मृत्यु भएको भन्दै पीडित परिवार र स्थानीयले अस्पताल परिसरमा शव राखेर नारावाजी गरेका थिए । आक्रोशित स्थानीयको भीड नियन्त्रण गर्न अस्पताल परिसरमा सुरक्षाकर्मी समेत परिचालन गरिएको थियो ।
स्थिति नियन्त्रणमा आउन नसकेपछि पीडित पक्षलाई न्याय दिलाउन मेची उद्योग वाणिज्य संघमा बसेको सर्वपक्षीय बैठकले उपचारमा संलग्न डाक्टर तत्काल निलम्बन गर्दै छानबिन समिति गठन गरी छानबिन गर्ने र पीडितलाई किरिया खर्च उपलब्ध गराउने सहमति भएको छ ।
किरिया खर्च वापत ५० हजार रुपैयाँ उपलब्ध गराउने र थप राहत प्रदान गर्न सहयोग जुटाउन पहल गर्ने सहमति भएको मेची उद्योग वाणिज्य संघका अध्यक्ष तथा छानविन समितिका संयोजक ऋषिराज तिम्सिनाले जानकारी दिए ।
उनका अनुसार बालकको उपचारमा प्रयोग गरिएको औषधि र सुइका बारेमा अस्पताल प्रशासनसँग बुझ्ने निर्णय भएको छ । मेचीनगर–९ खुट्टिडाँगी निवासी मृतक बालक स्थानीय पारिजात पब्लिक स्कुलको कक्षा ३ मा अध्यानरत थिए । सहमतिपछि मृतक बालकको सोमबार धुलाबारीस्थित रामघाटमा दाहसंस्कार गरिएको छ ।
प्रतिक्रिया दिनुहोस !
