बिर्तामोड : पूर्व–पश्चिम राजमार्ग अन्तर्गत झापाको मेचीनगर स्थित कालीझोडामा बोलेरो जीपको ठक्करबाट एक जनाको मृत्यू भएको छ भने एघार जना घाइते भएका छन्।
शुक्रबार राती करिब ८ बजे पूर्वबाट पश्चिमतर्फ आउँदै गरेको मे १ ज २८११ नम्बरको बोलेरो जीपले चारआली बजारमा पहिचान नखुलेका करिब ७५ वर्षीय पुरुष पैदलयात्री लाई ठक्कर दिएको थियो।
ठक्कर दिँदै अनियन्त्रित बनेको उक्त बोलेरोले सोही दिशातर्फ जाँदै गरेको मे १ ज १२०९ नम्बरको अर्को बोलेरो जीपलाई पछाडिबाट ठक्कर दिँदा मे १ ज १२०९ नम्बरको बोलेरोमा सवार ११ जना घाइते भएको जिल्ला प्रहरी कार्यालय झापाले जनाएको छ।
ठक्कर दिएर घाइते भएका पहिचान नखुलेका पैदल यात्रीको भने उपचारकै क्रममा मृत्यू भएको र अन्य घाइतेको बिर्तामोड स्थित बीएण्डसी अस्पतालमा उपचार भइरहेको जिल्ला प्रहरी कार्यालय झापाका प्रहरी प्रवक्ता महेन्द्रकुमार श्रेष्ठले बताए।
दुबै सवारी साधन र मे १ ज १२०९ नम्बरको जीप चालक शिवसताक्षी नगरपालिका १ का युवराज शंकरलाई नियन्त्रणमा राखेको उनले बताए। मे १ ज २८११ नम्बरका बोलेरो चालक फरार भएकोले खोजी कार्य भइरहेको प्रहरीले जनाएको छ।
प्रतिक्रिया दिनुहोस !
