बिर्तामोड : नेपालको पूर्वी नाका काँकरभिट्टा मंगलबार साँझ ६ बजेदेखि ४८ घण्टाका लागि बन्द गरिएको छ ।
भारतको सिमावर्ती क्षेत्रमा लोकसभा निर्वाचन हुने भएकाले काँकरभिट्टा लगायत सिमावर्ती इलाकामा नाका बन्द गरिएको हो ।
लोकसभा निर्वाचनमा मतदान हुनुभन्दा ४८ घण्टाअघि नेपाल–भारत सिमाना बन्द गरिएको इलाका प्रहरी कार्यालय काकरभिट्टाका प्रमुख डिएसपी महेश थापाले जानकारी दिए ।
अप्रिल १८ तारिख अर्थात् बैशाख ५ गते भारतको पश्चिम बंगाल स्थित नेपालसँग सिमाना जोडिएका पानीट्याङ्की, नक्सलबारी लगायत क्षेत्रमा लोकसभा सदस्य निर्वाचनको मतदान हुने भएकाले निर्वाचनको सुरक्षालाई ध्यानमा राखेर भारतीय पक्षले मंगलबार साँझ ६ बजेदेखि बिहीबार साँझ ६ बजेसम्मका लागि सीमा नाका बन्द गर्ने मौखिक जानकारी गराइसकेको र पत्र आउने प्रक्रियामा रहेको डिएसपी थापाले बताए ।
सीमा नाका बन्द भएको अवस्थामा कुनै पनि सवारी साधन र मानिस ओहोर दोहोर गर्न नपाइने प्रहरीले जनाएको छ । नेपाल वा भारतमा निर्वाचनका बेला मतदानको दिनभन्दा ४८ घण्टा अगाडि बिगतदेखि नै सीमा नाका बन्द गरिँदै आएको छ ।
प्रतिक्रिया दिनुहोस !
