बिर्तामोड : नेपालीलाई बाबु बनाएर वंशजका आधारमा नागरिकता लिन खोज्ने भारतीय नागरिक ३५ वर्षीय भूपाल गुरुङ कारागार चलान भएका छन् । झापा जिल्ला अदालतले उनलाई पुर्पक्षका लागि कारागार पठाएको हो ।
जेठो छोरा भन्दै भूपाललाई नागरिकता दिन खोज्ने कचनकवल–२ का बमबहादुर गुरुङ ३० हजार रुपैयाँ धरौटी तिरेर छुटेका छन् । आसामको मणिपुर कानकोपी जिल्ला बस्ने भूपाल र बमबहादुरलाई प्रहरीले प्रशासन कार्यालयबाट वैशाख १० गते पक्राउ गरेको थियो । उनीहरूविरुद्ध जेठ ३ गते मुद्दा दर्ता भएको थियो । त्यस दिन शुक्रबार परेकाले अदालतले बयान लिएको थियो । न्यायाधीश सन्तोषप्रसाद पराजुलीको एकल इजलासले आइतबार थुनछेकको आदेश सुनाएको अदालतका स्रेस्तेदार दुर्गाप्रसाद खनालले बताए ।
प्रचलित मुलुकी ऐनअनुसार नेपाली नागरिकता लिएको खण्डमा विदेशी नागरिकको हकमा एक वर्षदेखि पाँच वर्षसम्म कैद वा ५० हजारदेखि १ लाख रुपैयाँसम्म जरिवाना तोकिएको छ । तर, नागरिकता नलिई पक्राउ परेकाले सो सजाय तथा जरिवाना उद्योगमा गएर दर्ता हुन्छ । उद्योगमा ६ महिनादेखि साढे दुई वर्ष कैद र २५ हजारदेखि ५० हजारसम्म जरिवाना हुन्छ । कागजात मिलाउने वा सिफारिस गर्ने व्यक्तिको हकमा ६ महिनादेखि ३ वर्षसम्म कैद वा २५ हजारदेखि ५० हजारसम्म जरिवाना हुन्छ ।
कागजात मिलाउने कचनकवल–२ का वडाध्यक्ष, वडासचिवसहित नौ जनाको नाममा अदालतबाट पक्राउ पुर्जी जारी गरिएको थियो । वडाध्यक्ष मेखबहादुर भट्टराई, वडा सदस्य धनबहादुर गुरुङ, वडासचिव हरिप्रसाद गौतम, कर्मचारी खगेन्द्रप्रसाद खतिवडा, कचनकवल–२ का कविता गुरुङ, गंगाप्रसाद भट्टराई, तुलसीराम गुरुङ, प्रेमप्रसाद तिम्सिना, शिवकुमार दाहालका नाममा पक्राउ पुर्जी छ । उनीहरू सबै फरार थिए । वडासदस्य गुरुङ सोमबार अदालतमा उपस्थित भएका छन् । उनी ५० हजार धरौटी बुझाएर रिहा गरेको स्रेस्तेदार खनालले बताए । राजनीतिक संरक्षणका कारण प्रहरीले उनीहरूलाई पक्राउ गर्न चासो नदिएको स्थानीयको आरोप छ ।
जिल्ला प्रहरीले पक्राउ पुर्जी इलाका प्रहरी बनियानीका प्रहरी नायब निरीक्षक उदयशमेशर राणालाई पठाएको थियो । राणा अभियुक्तको सम्पर्कमा भए पनि पक्राउ नगरेको स्थानीय धनबहादुर लिम्बूले बताए । राणाले वडाध्यक्षलगायत व्यक्ति सम्पर्कमा रहेको स्वीकार गरे । ‘आउँछु भन्छन् तर कोही आउँदैनन्’, उनले भने ।
प्रतिक्रिया दिनुहोस !
