मड्रिड : यस सिजनको युरोपियन च्याम्पियन्स लिगको उपाधि इङ्लिस क्लब लिभरपुलले जितेको छ । शनिबार राति भएको फाइनलमा अर्काे इङ्लिस टोली टोटनह्यामलाई २–० ले हराउँदै लिभरपुलले उपाधि जितेको हो ।
स्पेनको मड्रिडस्थित वान्डा मेट्रोपोलिटिन रंगशालामा भएको खेलमा लिभरपुलले पेनाल्टी गोलमार्फत दोस्रो मिनेटमै अग्रता बनाएको थियो । खेल सुरु भएको पहिलो मिनेटमै टोटनह्यामका मिडफिल्डर सिसाकोले ह्यान्ड बल गरेपछि लिभरपुलले पेनाल्टी पाएको थियो । त्यसलाई मोहम सलाहले गोलमा परिणत गरी टोलीलाई अग्रता दिलाए ।
अधिकांह समय बल आफ्नो कब्जामा लिइ टोटनह्यामले निरन्तर दबाब सिर्जना गरे पनि गोल गर्न सकेन । ८७ औं मिनेटमा वरिजीले गोल गरी लिभरपुलको जित निश्चित बनाइदिए ।
सेमिफाइनलमा लिभरपुल स्पनिस क्लब बार्सिलोनालाई पराजित गरी फाइनल पुगेको हो। टोटनह्यामले डच टोली आजाक्समाथि जित निकाल्दै फाइनलको यात्रा तय गरेको थियो ।
गत सिजनको उप विजेता लिभुपरलले यससँगै च्याम्पियन्स लिगको ६ टाइटल जितेको छ । च्याम्पियन्स लिगको सर्वाधिक सफल टोली स्पेनिस क्लब रियल मड्रिड हो । उसले १३ सिजनको उपाधि जितेको छ । 
प्रतिक्रिया दिनुहोस !
