काठमाडौं : सत्तारुढ दल नेकपाका नेता भीम रावलले बजेटमा उल्लेख भएअनुसार नीति व्यवहारमा पालना गर्न नसकेको भन्दै सरकारको आलोचना गरेका छन् ।
सोमबार बसेको संघीय संसदको बैठकमा बोल्दै नेता रावलले सरकारको कडा आलोचना गरेका हुन् । अन्तर्राष्ट्रिय क्षेत्रको सम्बन्धमा बजेटमा सरकारले उल्लेख गरेका कुरा सकारात्मक भए पनि व्यवहारमा लागू हुन नसकेकोमा उनले आपत्ति जनाएका थिए ।
‘हाम्रो देशको स्वाधिनता, स्वतन्त्रता, राष्ट्रिय अखण्डता जस्ता विषय बजेटमा उल्लेख भइरहँदा पोखरामा किन खुला सैन्य तालिम हुन्छ ?’ नेता रावलले सोधे । अमेरिकी राजदूतले मर्यादा विपरीत गतिविधि गर्दैआएको भन्दै त्यसको पनि उनले विरोध गरे ।
अमेरिकी राजदूत र्यान्डी बेरीलाई लक्षित गर्दै नेता रावलले भियना अभिसन्धिको विरुद्ध अमेरिकी राजदूतले खुलेआम गतिविधि गर्दैआएको औंल्याएका थिए ।
बेरीले पछिल्लो समय ‘राजदूतसँग गफगाफ’ नामको कार्यक्रम सञ्चालन गर्दैआएका छन् । जुन उनको मर्यादा विपरीत रहेको भन्दै सरकारले त्यस्ता कार्यक्रम नियन्त्रण गर्नुपर्ने रावलको धारणा थियो । राष्ट्रियताको विषयमा यसअघि पनि नेता रावलले आफ्नै पार्टीका नेता तथा सरकारको विरुद्ध कडा अभिव्यक्ति दिँदैआएका छन् ।
प्रतिक्रिया दिनुहोस !
