लन्डन : बेलायतको इम्पेरियल कलेजका वैज्ञानिकको समूहले मुटु मर्मत गर्ने जैविक ‘प्याच’ विकास गरेका छन् ।
उनीहरूले ३ सेन्टिमिटर लामो र २ सेन्टिमिटर चौडा बुढीऔंला जत्रो जैविक प्याच प्रयोगशालामा विकास गरेको हो । लन्डनस्थित कलेजका वैज्ञानिकले विकास गरेको ‘प्याच’ मा ५ करोडभन्दा बढी कोष छन् ।
बिरामीकै ‘स्टेम सेल’ (कोष)बाट विकास गरिएको प्याचले हृदयघातपछि कमजोर भएका मुटुको मर्मत गर्न सक्ने वैज्ञानिक समूहले बताएको छ । करोडौं जीवित कोषको प्याचले बिरामीको शरीरका अन्य कोषले जस्तै शरीरोपयोगी रसायन बनाउनुका साथै कमजोर मुटुको मर्मत पनि गर्छ । बिरामीकै कोषबाट प्याचले आफूलाई स्वस्थ र काम गर्ने मांसपेशीमा विकसित हुन्छ ।
यसलाई मुटुमाथि सिलाएपछि निस्कासन गर्ने रसायनले मुटु मर्मत गर्नुका साथै मुटुका नयाँ कोषसमेत बनाउँछ । खरायोमा गरिएको परीक्षणबाट यो मानवका लागि पनि सुरक्षित र उपयोगी हुने देखिएको कलेजका वैज्ञानिकले बताएका छन् । उनीहरूले म्यानचेस्टरमा पत्रकार सम्मेलन गरी प्याचबारे जानकारी दिएका थिए । ब्रिटिस कार्डियोभास्कुलर सोसाइटीको बैठकले २ वर्षभित्र यो प्याचको परीक्षण मानवमा सुरु हुने जनाएको छ ।
सामान्यतया धमनी साँघुरिएर मुटुमा रगतको प्रवाहको मात्रा घट्छ र मुटुका मांसपेशी तथा कोषमा अक्सिजन, पोषक तत्वको कमी भएर हृदयघात हुन्छ । हृदयघातले मुटु कमजोर हुन्छ र रगत प्रवाह गर्ने क्षमता स्वात्तै घट्छ, जसले अन्ततः मुटुलाई अशक्त (काम गर्न नसक्ने) बनाइदिन्छ । ९ लाख २० हजार बेलायतीको बर्सेनि ‘हार्ट फेल’ हुन्छ ।
‘छिट्टै चिकित्सकले हृदयघात भएका व्यक्तिलाई यो प्याच राख्न सुझाउन पाउने अपेक्षा हामीले लिएका छौं’, अनुसन्धानकर्ता डा.रिचर्ड जाबोरले भने, ‘हार्ट फेल भएका बिरामीलाई केही औषधिसहित यो प्याच प्रेस्क्राइब गर्न सकिनेछ । चिकित्सकहरूले यो प्याच ¥याकबाट झिकेर सीधै बिरामीमा प्रत्यारोपण गर्न सक्नेछन् । अनुसन्धानका लागि अनुदान दिने ब्रिटिस हार्ट फाउन्डेसनका प्रोफेसर मेटिन आकिरणले भने, ‘हार्ट फेल एउटा उपचार नै नहुने स्थिति हो, जसले दैनिक जीवनयापन नै अत्यन्त कठिन बनाउँछ ।’
प्रतिक्रिया दिनुहोस !
