लिस्वोन : स्टार स्ट्राइकर क्रिस्टियानो रोनाल्डोले ह्याट्रिक पूरा गरेपछि पोर्चुगल यूईएफए नेसन्स लिग फुटबलको फाइनलमा प्रवेश गरेको छ । पोर्चुगलमा बिहीबार बिहान भएको सेमिफाइनल खेलमा पोर्चुगलले स्विट्जरल्यान्डलाई ३–१ गोलले हरायो ।
पोर्चुगलका कप्तानसमेत रहेका रोनाल्डोले २५औं मिनेटमा फ्रिकिक गोलमार्फत पहिलो गोल गरेका थिए । पहिलो हाफमा पोर्चुगल १–० गोलले अगाडि बढ्यो । दोस्रो हाफको सुरुआतमा जोसिलो प्रदर्शन गरेको स्विट्जरल्यान्डले ५७औं मिनेटमा पेनाल्टीमार्फत बराबरी गोल फर्काएको थियो । स्विट्जरल्यान्डका रिचार्डो रोड्रिग्वेजले पेनाल्टीको सदुपयोग गरेका थिए । स्विट्जरल्यान्डको पेनाल्टीपछि आक्रामक देखिएको पोर्चुगलले खेलको अन्तिममा दुई गोल थपेको थियो ।
खेलमा उत्कृष्ट प्रदर्शन प्रदर्शन गरेका रोनाल्डोले खेलको अन्तिम तीन मिनेटको बीचमा दुई गोल थपेका थिए । रोनाल्डोले ८८ मिनेटमा बर्नाडो सिल्भाको पासा दोस्रो गोल गरे । उनले ९०औं मिनेटमा कर्नरबाट प्राप्त बललाई जाली चुमाउँदै उत्कृष्ट गोल गर्दै ह्याट्रिक पूरा गरेका थिए । यससँगै रोनाल्डोले देशका लागि ८८ अन्तर्राष्ट्रिय गोल पूरा गरेका छन् । उनले देशका लागि ह्याट्रिक संख्या सात पु¥याए । उनले हालसम्म विभिन्न खेलका गरेर ५३ ह्याट्रिक पूरा गरिसकेका छन् । उनै रोनाल्डो प्रेरित पोर्चुगलले नेसन्स लिगको फाइनलमा इङ्ल्यान्ड र नेदरल्यान्डबीचको विजेतासँग प्रतिस्पर्धा गर्नेछ ।
प्रतिक्रिया दिनुहोस !
