एजेन्सी : कोपा अमेरिका कपको तयारीका लागि अन्तर्राष्ट्रिय मैत्रीपूर्ण खेल खेल्ने क्रममा ब्राजिलका नेमार घाइते भएका छन् । बिहीबार बिहान कतारसँगको मैत्रीपूर्ण खेल खेल्न क्रममा नेमार घाइते भएका हुन् । अघिल्लो साता कोपाका लागि तयारी गर्ने क्रममा घुँडाको चोट बोकेका नेमारको कतारसँगको खेलमा सोही चोट बल्झिएको थियो ।
२२औं मिनेटमा नेमार पुनः घाइते भएपछि मैदान छाडेका थिए । घाइते नेमारले कोपा नखेल्ने सम्भावनासमेत बढेको छ । मैत्रीपूर्ण खेलमा ब्राजिलले कतारलाई २–० गोलले हरायो । टोलीले खेल जिते पनि नेमार घाइते भएपछि ब्राजिललाई पीडा थपिएको छ । कतारलाई हराउन ब्राजिलका रिचार्लिसनले १६औं र गाब्रियल जेससले २४औं मिनेटमा गोल गरेका थिए ।
कतारले खेलको अन्तिम समयमा पेनाल्टी पाए पनि गोल गर्न सकेन । कोपा अमेरिकामा ब्राजिल समूह ‘ए’ मा परेको छ । यस समूहमा बोलिभिया, पेरु र भेनेजुएला छन् । ब्राजिलले जुन १५ मा बोलिभियासँग खेल्दै कोपा अमेरिकाको सुरुआत गर्नेछ । कतारले जुन १७ मा पराग्वेसँग पहिलो खेल खेल्नेछ ।
प्रतिक्रिया दिनुहोस !
