काठमाडौं : नेपाली कांग्रेसका स्थानीय तहका नेताले पार्टी सुधारका लागि १४ औं महाधिवेशन प्रक्रिया थाल्न नेतृत्वलाई दबाब दिएका छन् । उनीहरूले शीर्ष तह गुटमा अलमलिइरहेको र केन्द्र, प्रदेश तथा स्थानीय तहसम्म सशक्त प्रतिपक्षको भूमिकामा प्रस्तुत हुन नसकेको भन्दै महाधिवेशनमा जुट्न दबाब दिएका हुन् ।
जागरण अभियानमा स्थानीय तहमा कार्यकर्ताले अधिवेशन माग गरेको केन्द्रीय सदस्य प्रदीप पौडेलले बताए । उनले भने, ‘अधिवेशनबिना पार्टीमा सुधार आउन सक्दैन । जागरणले मात्र प्रभावकारी हुन सक्दैन भन्ने स्थानीय नेताको आवाज छ ।’ नेतृत्वले यसबारे ध्यान दिनुपर्ने उनको भनाइ छ । उनले अहिलेको जागरण पनि फलदायी रहेको बताए ।
अर्का केन्द्रीय प्रतिनिधि नगेन्द्र कुमालले स्थानीय नेताले महाधिवेशनमा गए पार्टी स्वतः सक्रिय रहने धारणा आएको बताए । उनले भने, ‘स्थानीय तहका साथीहरूले महाधिवेशन प्रक्रिया थालनी गरेमात्रै पार्टीमा जागरण आउन सक्ने भन्दै त्यसमा जुट्न आग्रह गरेका छन् ।’
नियमित प्रक्रियाअनुसार आउने फागुनमा कांग्रेसको १४औं महाधिवेशन हुनुपर्छ । तोकिएको समयमै महाधिवेशन गर्ने हो भने स्थानीय तहदेखि अधिवेशन प्रक्रिया सुरु भइसक्नुपर्ने थियो । तर, पार्टी सभापति शेरबहादुर देउवा विशेष अवस्थामा मात्र कार्यकाल थप्न सकिने प्रावधानमा टेकेर १ वर्ष लम्ब्याउन खोज्दै छन् ।
यसैबीच कांग्रेसले सुरु गरेको पहिलो चरणको जागरण अभियान शनिबार सकिँदै छ । पार्टीको तल्लो तहसम्मै सुधारको अपेक्षा र सरकारविरुद्ध उत्रने उद्देश्यसाथ २५ वैशाखदेखि एकमहिने जागरण अभियान सुरु गरेको थियो । उक्त जागरणबारे समीक्षा गरेर दोस्रो चरणको कार्यक्रम ल्याउने कांग्रेस तयारी छ । कांग्रेसले तीन चरणको ९ महिने लामो देशव्यापी जागरण अभियान घोषणा यस वर्षको सुरुमै गरेको थियो । दोस्रो चरणको अभियान भदौमा सुरु हुँदै छ । पहिलो चरणको कार्यक्रम समापनको सन्दर्भमा हरेक जिल्लामा आमसभा गर्दै छन् । कार्यक्रमका लागि सभापति शेरबहादुर देउवा विराटनगर जाँदै छन् भने वरिष्ठ नेता रामचन्द्र पौडेल पश्चिमकै जिल्लातिर छन् । ललितपुरमा शुक्रबार आयोजित जागरण सभालाई सम्बोधन गर्दै सभापति देउवाले पार्टीको गुमेको साख यो अभियानबाट फिर्ता गराउन आमनेताकार्यकर्तालाई आग्रह गरे । ‘हामीले गत निर्वाचनमा जे–जे गुमायौं, त्यो सबै अब फिर्ता गर्न पार्टीका केन्द्रदेखि तलसम्मै लाग्नुपर्छ,’ देउवाले भने ।
प्रवक्ता विश्वप्रकाश शर्माले पहिलो चरणको जागरण अभियानले पार्टीको तल्लो तहसम्मको समस्या केन्द्रीय नेताले थाहा पाएको र सिंगो पार्टी चलायमान भएको दाबी गरे । ‘निर्वाचनमा हार व्यहो¥यो’, प्रवक्ता शर्माले भने, ‘त्यसपछि पार्टीको समस्या सूक्ष्म ढंगले केलाउनुपथ्र्याे, जुन यसबाट सुरु भएको छ ।’ पहिलो चरणको जागरण अभियानका लागि केन्द्रबाट गएका प्रतिनिधि काठमाडौं आएर आ–आफ्नो क्षेत्रको सम्पूर्ण विवरण २८ गतेभित्र पार्टीलाई बुझाउनुपर्नेछ । त्यसपछि केन्द्रीय समितिको बैठक गरेर कांग्रेसले पहिलो चरणको जागरण अभियानको समीक्षा गर्ने योजना बनाएको छ । प्रवक्ता शर्माले पहिलो चरणमा देखिएको कमीकमजोरी वा स्थानीय नेता–कार्यकर्ताले सुझाएका कुरासहित दोस्रो चरणको अभियान सुरु हुने बताए ।
अभियानमा गएकाहरूलाई स्थानीय नेताले निर्वाचन अभियान सुरु गरेको, पार्टीको संरचना किन बन्न नसकेको र पार्टीको केन्द्रमा बढी समस्या देखिएकोजस्ता गुनासा गरेका छन् । समग्रमा पार्टीलाई अधिवेशन चाहिएको भन्दै गुनासा आइरहेका छन् ।
प्रतिक्रिया दिनुहोस !
