लन्डन : जासन रोयले १५३ रनको शतकीय पाली खेलेपछि घरेलु टोली इङ्ल्यान्डले आईसीसी एकदिवसीय विश्वकप क्रिकेटअन्तर्गत शनिबार भएको खेलमा बंगलादेशविरुद्ध १०६ रनको जित निकालेको छ । इङ्ल्यान्डले दिएको ३८७ रनको विशाल लक्ष्य पछ्याएको बंगलादेश ४८.५ ओभरमा सबै विकेट गुमाउँदै २८० रनमा समेटिएपछि इङ्ल्यान्डले जारी विश्वकपमा दोस्रो जित हात पारेको हो ।
बंगलादेशका अलराउन्डर सकिब अल हसनले प्रभावशाली प्रदर्शन गरे पनि टोलीलाई जित दिलाउन सकेनन् । टोलीले आठ रन मात्र जोडेको अवस्थामा प्रारम्भिक ब्याट्सम्यान सौम्य सरकार दुई रन बनाउँदै पेभेलियन फर्किएपछि ब्याटिङ गर्न आएका सकिबले सानदार पाली खेल्दै १२१ रन बनाए । बेन स्टोक्सको बलमा बोल्ड हुनुअघि उनले ११९ बलमा एक छक्का र १२ चौका प्रहार गरे । सकिब र विकेटकिपर ब्याट्सम्यान मुसफिकर रहिमले १०६ रनको साझेदारी गर्दै बंगलादेशलाई खेलमा फर्काएका थिए । मुसफिकरले ४४ रन बनाए । यस्तै महमोदुल्लाले २८, मोसादेक हुसेनले २६ र प्रारम्भिक ब्याट्सम्यान तमिम इक्वालले १९ रन बनाए ।
इङ्ल्यान्डका बेन स्टोक्स र जोफरा आर्चरले ३–३ विकेट लिए ।यस्तै मार्क उड दुई विकेट लिँदा लियाम प्लुनकेट र अडिल रसिदले एक÷एक विकेट हात पारे ।
जारी विश्वकपमा इङ्ल्यान्डको दोस्रो जित हो । इङ्ल्यान्डले विश्वकपको उद्घाटन खेलमा बलियो प्रतिद्वन्द्वी दक्षिण अफ्रिकालाई १०४ रनले पराजित गरेको थियो । पहिले ब्याटिङ गर्दै आठ विकेट गुमाएर ३११ रन बनाएको इङ्ल्यान्डले दक्षिण अफ्रिकालाई ३९.५ ओभरमा २०७ रनमा समेट्दै विजयी सुरुवात गरेको थियो ।
दोस्रो खेलमा भने घरेलु टोली इङ्ल्यान्ड पाकिस्तानसँग १४ रनले पराजित भएको थियो । पाकिस्तानले दिएको ३४९ रनको विशाल लक्ष्य पछ्याएको इङ्ल्यान्डले ५० ओभर नै खेलेर नौ विकेट गुमाएर ३३४ रन मात्र बनाउन सकेको थियो ।
यसैगरी बंगलादेशको भने तेस्रो खेलमा दोस्रो हार हो । पहिलो खेलमा दक्षिण अफ्रिकालाई २१ रनले पराजित गरेको बंगलादेश दोस्रो खेलमा न्युजिल्यान्डसँग दुई विकेटले पराजित भएको थियो ।
विश्वकपमा अब इङ्ल्यान्डले जुन १४ मा वेस्ट इन्डिजसँग प्रतिस्पर्धा गर्नेछ । बंगलादेशले भने जुन ११ मा अर्को दक्षिण एसियाली टोली श्रीलंकाको सामना गर्नेछ ।
यसअघि बंगलादेशले टस जितेर पहिले फिल्डिङ रोजेपछि ब्याटिङमा उत्रिएको घरेलु टोली इङ्ल्यान्डले निर्धारित ५० ओभरमा ६ विकेट गुमाएर ३८६ रनको विशाल योगफल खडा गरेको थियो । इङ्ल्यान्डको जितमा प्रारम्भिक ब्याट्सम्यान जासन रोयले शतकीय पाली खेले । आक्रामक ब्याटिङ गरेका रोयले १५३ रन बनाए । ३४.४ ओभरसम्म क्रिजमा डटेका रोयले १२१ बलमा पाँच छक्का र १४ चौका हिर्काए।
यसैगरी अर्का प्रारम्भिक ब्याट्सम्यान जोनी बेयरस्ट र जस बट्लरले पनि अर्धशतकीय पाली खेले । रोय र बेयरस्टले पहिलो विकेटका लागि १२८ रनको साझेदारी गरेका थिए । रोयले ५१ र जस बट्लरले ६४ रन बनाए । यस्तै कप्तान इयोन मोर्गनले ३५, लियाम प्लुनकेटले २७, जोए रुटले २१ र क्रिस वाक्सले १८ रन बनाए ।
बंगलादेशका मोहमद सैफुद्दिन र मेहदी हसनले दुई÷दुई विकेट लिए । यस्तै कप्तान मसरफे मोर्तजा र मस्ताफिजुर रहमानले एक÷एक विकेट हात पारे ।
प्रतिक्रिया दिनुहोस !
