इङ्ल्याण्ड : जारी आईसीसी एकदिवसीय विश्वकप क्रिकेटमा न्युजिल्याण्डले लगातार तेस्रो जित हात पारेको छ । शनिबारको खेलमा अफगानिस्तानलाई ७ विकेटले पराजित गरी तेस्रो जित निकालेको हो।
इङ्ल्याण्डको टाउनटनस्थित रंगशालामा भएको खेलमा न्युजिल्याण्डले टस जितेर पहिले बलिङ रोजेको थियो । अफगानिस्तानले पहिले ब्याटिङ गर्दै ४१.१ ओभरमा सबै विकेट गुमाई १७२ रन बनायो । १७३ रनको लक्ष्य न्युजिल्याण्डले ३२.१ ओभरमा ३ विकेग गुमाएर पूरा गर्यो । न्युजिल्याण्डको सहज जितका लागि कप्तानसमेत रहेका केन विलियमसनले ७९ रनको योगदान गरे । रोस टेलरले ४८ र कोलिन मुन्रोले २२ रन बनाए । अफगानिस्तानले पहिलो बलमा नै न्युजिल्याण्डका आक्रामक ब्याट्सम्यान मार्टिन गुप्टीललाई आउट गरी दबाब बनाउने कोसिस गरेको थियो । न्युजिल्याण्डको तीनै विकेट अफगानिस्तानका अफताब आलमले लिए ।
चोटका कारण आफ्ना महत्वपूर्ण ओपनर ब्याट्सम्यान मोहमद सहजादलाई गुमाएको अफगानिस्तानले बलियो न्युजिल्याण्डविरुद्ध उत्कृष्ट सुरुवात गरेको थियो । हजरातौल्लाह जाजई र नुर अली जाड्रनले पहिलो ओभरदेखि नै आक्रमण सुरु गरेका थिए । ११औं ओभरको पाचौं बलमा आक्रामक ब्याटिङ गर्न सक्षम युवा खेलाडी हजरातौल्लाह जाजई आउट भएपछि अफगानिस्तानको पारीमा ब्रेक लाग्यो ।
जाजई २८ बलमा ५ चौका र १ छक्कासहित ३४ रन बनाएर आउट भए । १२ औं ओभरको पहिलो बलमा अर्का ओपनर नुर अली जाड्रन पनि ३८ बलमा ३१ रन बनाएको अवस्थामा आउट भएपछि अफगानिस्तान खेलमा फर्कन सकेन । लगातार विकेट गुम्नेक्रम जारी रह्यो । ४१.१ ओभरमा अलआउट हुँदै अफगानिस्तानले १७२ रन मात्रै बनाउन सक्यो । चौथो नम्बरमा ब्याटिङमा आएका हसमातुल्लाह शाहिदीले सम्मालिएर ब्याटिङ गर्दै अफगानिस्तानको स्कोर उकास्ने कोसिस गरे पनि अन्यले उनलाई साथ दिन सकेनन् । शाहिदीले ९९ बलमा ५९ रन बनाएर १० औं विकेटकोरुपमा आउट भएका थिए ।
अफगानिस्तानकालाई धरासायी बनाउने क्रममा न्युजिल्याण्डका मध्यम तीब्र गतिका बलर जेम्स निसमले मात्रै ५ विकेट लिए । तीब्र गतिका बलर लोकीज र्फगुसनले ४ विकेट लिए ।
न्युजिल्याण्डले विश्वकपमा तीनै खेलमा जित निकाली तालिकाको शीर्ष स्थानमा रहन सफल भएको छ । अफगानिस्तानले लगातार ३ खेलमा हार व्यहोरेको छ ।
प्रतिक्रिया दिनुहोस !
