लन्डन : आईसीसी एकदिवसीय विश्वकप क्रिकेटमा आइतबार दुई प्रभावशाली टोली साविक विजेता अस्ट्रेलिया र भारत आपसमा भिड्दै छन् । उक्त खेल दी ओभल स्टेडियममा नेपाली समयअनुसार दिउँसो ३ः१५ बजे सुरु हुने छ । विश्वभरिका क्रिकेट पारखीलाई यो खेलले भरपूर मनोरञ्जन दिने विश्वास गरिएको छ । यी दुवै टोली विश्वकप उपाधि दाबेदार हुन् । दुवै टोली पहिलो संस्करणदेखि नै विश्वकपमा सहभागी हुँदै आएका छन् ।
यसअघि नै विश्वकपको उपाधि जितिसकेका दुई टोली यसपटक पनि उपाधि हत्याउने अभियानमा छन् । साविक विजेता अस्ट्रेलिया सबै खेलमा जित निकाल्दै फाइनल यात्रा तय गर्ने दाउमा छ । भारतको योजना पनि उस्तै छ । विश्वकपमा अस्ट्रेलियाले दुई खेल खेलिसकेको छ । अस्ट्रेलियाले पहिलो खेलमा अफगानिस्तानलाई सात विकेटले हराएको थियो । दोस्रो खेलमा भने अस्ट्रेलियाले वेस्ट इन्डिजलाई १५ रनले पराजित गरेको थियो । भारतले भने एक खेल खेलेको छ । भारतले पहिलो खेलमा दक्षिण अफ्रिकालाई ६ विकेटले पराजित गरेको थियो ।
साबिक विजेता अस्ट्रेलियाले हालसम्म पाँच पटक विश्वकपको उपाधि जितिसकेको छ । अस्ट्रेलियाले सन् १९८७ मा पहिलो पटक विश्वकप जितेको थियो । त्यसपछि अस्ट्रेलियाले सन् १९९९, सन् २००३ र सन् २००७ मा लगातार तीन पटक विश्वकपको उपाधि उचाल्यो । सन् २०१५ मा आफ्नै देशमा आयोजना भएको विश्वकपको फाइनलमा सहआयोजक न्युजिल्यान्डलाई सात विकेटले हराउँदै अस्ट्रेलियाले पाँचौं पटक उपाधि कुम्ल्याएको थियो ।
त्यसैले विश्वकपमा अस्ट्रेलिया सबैभन्दा बलियो टोलीको रूपमा देखिएको छ । एरोन फिन्चको कप्तानीमा रहेको अस्ट्रेलिया हरेक क्षेत्रमा अब्बल देखिएको छ । पहिलो खेलमा अस्ट्रेलियन बलरले तुलनात्मक रूपमा कमजोर अफगानिस्तानलाई दुई सय सात रनमा समेटेका थिए । उक्त खेलमा अस्ट्रेलियाका लागि तीव्र गतिका बलर प्याट कुमिन्स र स्पिनर एडम जाम्पाले तीन÷तीन विकेट लिएका थिए । ब्याटिङमा दुवै ओपनर डेभिड वार्नर (अविजित ८९ रन) र एरोन फिन्च (६६ रन) ले अर्धशतक बनाएका थिए । दोस्रो खेलमा वेस्ट इन्डिजविरुद्ध पनि अस्ट्रेलियाले सानदार प्रदर्शन गरेको थियो । अस्ट्रेलियाको पालिलाई स्टेभन स्मिथ, नाथन कल्टर नाइल र विकेटकिपर ब्याट्सम्यान एलेक्स केरीले सम्हालेका थिए । कल्टर नाइलले ९२ रन बनाएका थिए । स्मिथले ७३ र केरीले ४५ रन बनाएका थिए । उक्त खेलमा बलिङमा अस्ट्रेलियाका मिचेल स्टार्कले पाँच विकेट लिए । यस्तै प्याट कुमिन्सले दुई र एडम जाम्पाले एक विकेट लिएका थिए ।
यसैगरी दुई पटक विश्वकपको उपाधि चुमेको भारत विश्व क्रिकेटको बलियो टोली हो । भारतले सन् १९८३ र सन् २०११ को विश्वकप उपाधि जितेको थियो । सन् २००३ को विश्वकपको फाइनलमा भने भारतीय टोली अस्ट्रेलियासँग पराजित भएको थियो । जारी विश्वकपमा सहभागी अधिकांश टोलीले दुई÷दुई खेल खेलिसकेपछि बल्ल भारतले दोस्रो खेल खेल्न लागेको हो । विराट कोहलीको कप्तानीमा रहेको भारतीय टोलीमा स्टार र अनुभवी खेलाडीको जमघट छ ।
सन् २०११ मा भारतले विश्वकप जित्दाका कप्तान महेन्द्रसिंह धोनी अहिले पनि टोलीका प्रभावशाली खेलाडीका रूपमा छन् । दक्षिण अफ्रिकासँगको पहिलो खेलमा भारतका लागि प्रारम्भिक ब्याट्सम्यान रोहित शर्माले एक सय २२ रनको शतकीय पालि खेलेका थिए । टोलीलाई जिताउन महेन्द्रसिंह धोनीले पनि ३४ रनको योगदान गरेका थिए । बलिङमा भारतका युजभेन्द्र चाहलले चार तथा भुवनेश्वर कुमार र जसप्रीत बुमराहले दुई÷दुई विकेट लिएका थिए ।
भारत र अस्ट्रेलियाबीच यसअघि भएको भिडन्तमा अस्ट्रेलिया बलियो देखिएको छ । यसअघिका विश्वकपमा दुई टोली ११ पटक भिडेका छन् । त्यसमा अस्ट्रेलियाले आठ र भारतले तीन खेल जितेको छ । दुई टोलीबीच भएको अन्य एकदिवसीय खेलमा पनि अस्ट्रेलिया नै बलियो देखिएको छ । दुई टोलीबीच भएको एक सय ३६ एकदिवसीय खेलमा अस्ट्रेलिया ७७ खेलमा विजयी भएको छ भने भारतले ४९ खेल जितेको छ । १० खेल अनिर्णित भएको थियो । त्यसैले आइतबार हुने खेलमा अस्ट्रेलिया र भारत दुवैका लागि निकै महŒवपूर्ण छ । दुवै टोली आफ्नो अपराजित यात्रा कायम राख्ने धुनमा छन् ।
आजको खेल
अस्ट्रेलियाविरुद्ध भारत
दी ओभल (दिउँसो ३ः१५ बजे)
विश्वकपमा दुई टोली
कुल : ११ खेल
अस्ट्रेलिया विजयी : ८ खेल
भारत विजयी : ३ खेल
एकदिवसीयमा दुई टोली
कुल : १३६ खेल
अस्ट्रेलिया विजयी : ७७ खेल
भारत विजयी : ४९ खेल
अनिर्णित : १० खेल
प्रतिक्रिया दिनुहोस !
