आईसीसी एकदिवसीय विश्वकपको चर्चासँगै विश्वकप ट्रफीको इतिहास पनि रमाइलो छ । सन् १९७५ देखि १९९६ सम्म खेलिएका सुरुका ६ संस्करणलाई आईसीसी ट्रफीलाई विश्वकप ट्रफी भनिएन । त्यति बेला जुन कम्पनीले प्रायोजन गर्थे, उसैको नाम ट्रफीमा लेखिन्थ्यो । इङ्ल्यान्डले सन् १९९९ मा आयोजना गरेको विश्वकपपछि विश्वकप ट्रफीको पनि नाम र स्वरूप फेरिएको हो ।
इङ्ल्यान्ड विश्वकपपछि आईसीसी ट्रफीको नामकरण गरियो । सन् १९७५, १९७९ र १९८३ को विश्वकप ट्रफीलाई प्रुडेन्सियल कप भनिन्थ्यो । त्यसपछि सन् १९८७ को ट्रफीलाई रिलायन्स कप ट्रफी भनियो । सन् १९९२ को ट्रफीलाई वेसन हेसेज कप भनियो । सन् १९९६ को विश्वकप ट्रफीले विल्स ट्रफीको नाम पायो । सन् १९९९ देखि हालसम्म विश्वकप ट्रफीको नाम आईसीसी विश्वकप ट्रफीको नामले प्रचलित छ । आईसीसी विश्वकप ट्रफीको निर्माण सुन र चाँदीबाट गरिएको छ ।
ट्रफीको माथिल्लो भागमा पृथ्वीको आकारमा सुनको ग्लोब बनाइएको छ । त्यसलाई दुईतिर चाँदीले बनेका तीनवटा स्तम्भले अड्याइएको छ । चाँदीले बनेको स्तम्भ विकेट र बलको आकारको छ । यसले ब्याटिङ, बलिङ र फिल्डिङ बुझाउँछ । ट्रफीलाई अड्याउने मुख्य बेस भने काठबाट बनाइएको छ । यस ट्रफीको उचाइ ६० सेन्टिमिटर र तौल ११ केजी छ । विश्वकप विजेताले असली ट्रफी भने पाउँदैनन् । विजेतालाई ट्रफीको रिप्लिका (प्रतिलिपि) मात्र दिने गरिएको छ ।
प्रतिक्रिया दिनुहोस !
