लन्डन : शिखर धवनले शतक तथा कप्तान विराट कोहली र रोहित शर्माले अर्धशतक बनाएपछि आईसीसी एकदिवसीय विश्वकप क्रिकेटअन्तर्गत आइतबार राति भएको खेलमा भारतले साविक विजेता अस्ट्रेलियालाई ३६ रनले पराजित गर्दै लगातार दोस्रो जित हात पारेको छ । लन्डनको दी ओभल क्रिकेट मैदानमा भएको खेल निकै प्रतिस्पर्धात्मक बनेको थियो ।
अस्ट्रेलियाका लागि पुछारका ब्याट्सम्यान एलेक्स क्यारीले आक्रामक ब्याटिङ गरेपछि खेल निकै रोचक बनेको थियो । क्यारीले अविजित ५५ रन बनाए । उनले ३५ बलमा एक छक्का र पाँच चौका प्रहार गरे ।भारतले दिएको ३५३ रनको विशाल लक्ष्य पछ्याएको अस्ट्रेलियाले पूरै ५० ओभर खेल्दै ३१६ रनमा अलआउट भयो ।
अस्ट्रेलियाका क्यारी बाहेक स्टेभन स्मिथ र प्रारम्भिक ब्याट्सम्यान डेभिड वार्नरले पनि अर्धशतकीय पाली खेले । लामो समय क्रिजमा टिकेका स्मिथले ७० बलमा एक छक्का र पाँच चौकाको मद्दतमा ६९ र वार्नरले ८४ बलमा पाँच चौकाको मद्दतमा ५६ रन बनाए ।
यसैगरी उस्मान ख्वाजाले ४२, कप्तान एरोन फिन्चले ३६, ग्लेन म्याक्सवेलले २८ रन बनाए ।भारतका जसप्रीत बुमराह र भुवनेश्वर कुमारले तीन÷तीन विकेट हात पारे । यस्तै युजभेन्द्र चाहलले दुई विकेट लिए ।
जारी विश्वकपमा भारतको लगातार दोस्रो जित हो । यसअघि भएको खेलमा भारतले दक्षिण अफ्रिकालाई ६ विकेटले पराजित गरेको थियो । अहिलेसम्म तीन खेल खेलेको अस्ट्रेलियाको भने पहिलो हार हो । अस्ट्रेलियाले यसअघि अफगानिस्तानलाई सात विकेट र वेस्ट इन्डिजलाई १५ रनले पराजित गरेको थियो ।
टस जितेर पहिले ब्याटिङ गरेको भारतले निर्धारित ५० ओभरमा पाँच विकेट गुमाएर ३५२ रनको योगफल खडा गरेको थियो । भारतको विशाल पालीमा शिखर धवनले शतक तथा रोहित शर्मा र कप्तान विराट कोहलीले अर्धशतक बनाए ।
प्रारम्भिक ब्याट्सम्यान धवनले ११७ रन बनाए । १०९ बलको सामना गरेका उनले १६ चौका हिर्काए । एकदिवसीय क्रिकेटमा धवनले प्रहार गरेको यो १७औं शतक हो ।
यसैगरी रोहितले ५७ र विराटले ८२ रन बनाए । यस क्रममा रोहितले एक छक्का र तीन चौका तथा विराटले दुई छक्का र चार चौका हिर्काए । एकदिवसीय क्रिकेटमा विराटको ५०औं र रोहितको ४२औं अर्धशतक हो । यसैगरी हार्दिक पाण्ड्याले ४८, महेन्द्रसिंह धोनीले २७ र लोकेश राहुलले ११ रन बनाए ।
अस्ट्रेलियाका मार्कस स्टोइनिक्सले दुई विकेट लिए । यस्तै प्याट कुमिन्स, मिचेल स्टार्क र नाथन कल्टर नाइलले एक÷एक विकेट हात पारे ।
विश्वकप क्रिकेटअन्तर्गत अब अस्ट्रेलियाले बुधबार आफ्नो चौथो खेलमा अर्को दक्षिण एसियाली राष्ट्र पाकिस्तानको सामना गर्नेछ । भारतले भने बिहीबार न्युजिल्यान्डसँग प्रतिस्पर्धा गर्नेछ ।
प्रतिक्रिया दिनुहोस !
